KYK WEER NA NAMPO OP SATERDAG
Die brief “‘Ja’ vir Nampo op Saterdag” (LBW ,1Junie 2018) en mnr. Toit Wessels van Graan SA se antwoord het betrekking. Toit, ek was ook vanjaar vinnig by die skou (basies van 09:00 tot 15:00, want dit is baie ver soontoe en terug en ek wil nie in die middel van die week oorslaap nie) en was beïndruk met wat julle aanbied.
Ek is nie oortuig deur die argumente teen ’n Saterdag-skoudag nie.
Dit is dalk ’n oorvereenvoudiging, maar julle behoort die uitstallers taamlik maklik in twee breë kategorieë te kan indeel – dié wat uitstal en met die kommersiële landbousektor handel dryf, en dan dié wat ook met die breër publiek handel dryf.
Die uitstallers wat op die landbousektor konsentreer, wil inligting deurgee en nie noodwendig op die dag verkoop nie. Die kommersiële kopers kyk na die oesmasjiene, teel- en plantmateriaal, infrastruktuur, besproeiingstelsels, bemesting, ensovoorts. Hulle koop nie noodwendig op die dag nie. Hulle neem waar en samel inligting in.
Dan is daar die klomp uitstallers wat daar is om op die dag aan die publiek te verkoop – kampeer- en jagtoerusting, klere, kos, diere, ensovoorts.
Sekere dinge, soos sekuriteitstelsels, kraggereedskap, skoonmaaktoerusting en luukse voertuie, word nie noodwendig op die dag verkoop nie, maar val in die boere én die breër publiek se belangstellingsveld.
Die meeste uitstallers val wel in die eerste kategorie en stel minder belang in die breër publiek, want hul kliënte kan in die week kom – dis hul werkstyd. Hierdie kategorie uitstaller sal in der ewigheid nie baie ten gunste van ’n Saterdag wees nie. Julle hoef hulle nie eens te vra nie, want die antwoord is reeds bekend.
“Die feit dat hulle dan nie Maandag al operasioneel by hul werk kan wees nie”, soos jy sê, is egter eintlik irrelevant, want hulle was sopas ’n hele week nie by die werk nie. Hul werkplek of kantoor het die vorige week sonder hulle reggekom.
Die enigste argument wat water hou, is die dubbele betaling op ’n Saterdag of Sondag wanneer daar opgepak moet word. Dit moet geweeg word teen die dag langer blootstelling.
’n Saterdag sal sekerlik uitstallers in die tweede kategorie baie meer bevoordeel as dié in die eerste kategorie, maar die dag is nie verlore of tydmors vir laasgenoemde nie. ’n Boer en sy eggenoot kan elkeen in hul eie rigting gaan. Een gaan kyk na die besproeiingstelsel en die ander een gaan shop dat dit hop daar in die tweede kategorie-ruimtes of, as hy of sy deel van die boerdery is, gaan kyk solank na die databestuurs- of finansiële oplossings.
“Ons het twee jaar terug met ons uitstallers (wat ek as ons vennote beskou, want sonder hulle het ons geen skou nie) ’n vergadering gehou rakende die Saterdag ook oop wees. Die meeste het daarteen gestem,” skryf jy.
Jul grootste vennote is sekerlik jul kopers – nog belangriker as die uitstallers. Ek lei af julle het nog nie ’n meningsopname onder die publiek gehou nie. ’n Mens kan nie die besoekers vra wat die fees bywoon nie, want hulle kan daar wees. Jy moet by die mense probeer uitkom wat nié in die week daar kan wees nie.
Julle kan dalk van mening wees dat die fees groot genoeg is of die teikengroep genoegsaam tref. In daardie geval mors ek my tyd. Jammer dan.
Soos verwag, het ek baie min mense onder 18 jaar op vanjaar se Oesdag gesien.
In hierdie geval moet julle die besluit neem (nie die uitstallers nie – hulle sal nie ophou om uit te stal as julle die skou met ’n dag verleng nie) en besef in watter gebied of rigting julle die skou wil sien uitbrei.
Ek weet nie van julle nie, maar ek sien ’n groot geleentheid vir groei wanneer julle die boer se gesin en vriende in ander sektore ook begin betrek. THEUNIS HANEKOM