Nasionale minimum loon in NV goedgekeur
ONDANKS waarskuwings van die Tesourie dat die gewysigde arbeidswetgewing wat die Regering wil instel ’n ekonomiese inkrimping van 2,1% en meer as 700 000 werksverliese kan meebring, is dit naelskraap in die Nasionale Vergadering goedgekeur.
Die wetsontwerp op die nasionale minimum loon, wat ’n basiese loon van R20 per uur voorstel (niemand in Suid-Afrika mag minder as dit verdien nie), en die Wysigingswet op Arbeidsverhoudinge en die Wet op Basiese Diensvoorwaardes sal nou voor die Nasionale Raad van Provinsies dien.
GEMENGDE REAKSIE
Die DA het teen hierdie wetsontwerpe gestem en aangevoer daar is nie behoorlike openbare verhore gehou nie en dat duisende mense hul werk kan verloor.
Die kantoor van die ANC se hoofsweep het egter gesê die aanvaarding van dié geskiedkundige wetgewing vir ’n minimum loon sal help om die miljoene kwesbare werkers te beskerm wat veel minder as R20 per uur verdien.
Die nasionale minimum loon sal ’n beter inkomste vir sowat 75% van alle werkers in die landbou beteken wat minder as R2 000 per maand verdien. Dit geld ook 90% van huiswerkers wat minder as R3 120 per maand verdien, sê mnr. Jackson Mthembu, hoofsweep van die ANC in die Parlement. “Dit verteenwoordig beduidende vordering om te verseker dat werkers teen ‘slaaflone’ beskerm word.”
BOERE BYGESTAAN
Agri SA het weer die versekering gegee dat hy die leiding sal neem in verband met dié kwessie. Die organisasie raai ook belanghebbendes aan om waaksaam te wees oor die impak wat die nasionale minimum loon op finansieel kwesbare boerdery-ondernemings sal hê.
Mnr. Neil Hamman, voorsitter van Agri SA se arbeid- en ontwikkelingsentrum vir uitnemendheid, sê die landbousektor is ingewikkeld, veral as ’n mens in ag neem die meeste boerdery-eenhede kan as klein tot mediumgroot ondernemings (SME’s) beskou word.
Baie van hulle teken reeds verliese aan weens droogtetoestande én lae internasionale kommoditeitspryse. Die loon is egter ’n stap in die rigting van sekerheid.
Die datum waarop die loon inwerking tree, moet nog vasgestel word.