ONTEIENING: ‘MILJOENE KOMMENTARE MOET INKOM’
DIE georganiseerde landbou is dankbaar dat die datum vir kommentaar oor die voorgestelde wysiging van die Grondwet ten opsigte van die onteiening van grond sonder vergoeding uitgestel is.
“Ons is dankbaar vir die uitstel, want dit gee ons tyd om meer mense te bereik,” sê mnr. Bennie van Zyl, hoofbestuurder van TLU SA.
Dit volg nadat die parlementêre moniteringsdiens vroeër aangekondig het die sluitingsdatum om kommentaar te ontvang is van 31 Mei tot 15 Junie verleng.
Openbare verhore oor die kwessie sal landwyd van 26 Junie tot 6 Augustus plaasvind. Die volledige skedule van verhore is by die skakel http://bit.ly/2jV8Krt op Landbou.com beskikbaar.
Me. Annelize Crosby, hoof
van grondsake by Agri SA, sê na verwagting sal dié voorstel en die parlementêre proses die meeste kommentaar oplewer wat tot nog toe op ’n Suid-Afrikaanse beleid gelewer is.
Die komitee het reeds meer as 140 000 bydraes ontvang, en tot ’n halfmiljoen word verwag.
“Ons hoop dat daar meer as 2 miljoen kommentare sal wees sodat alle kommentare en besware deurgegee kan word,” sê Van Zyl. Hy is tans besig om wyd oor Suid-Afrika heen te reis om boere aan te moedig om hul kommentaar en besware oor die voorgestelde wysiging in te stuur.
Crosby sê Agri SA se provinsiale affiliasies en bedryfskamers is tans besig om hul kommentaar in te stuur sodat dié organisasie ’n deeglike en oorhoofse voorlegging kan instuur.
“Ons sal steeds ons kommentaar teen 31 Mei lewer. Die dokument kan na verwagting tot 200 bladsye lank wees.” Navrae en kommentaar kan per e-pos aan me. Pat Jayiya gestuur word by pjayiya@parliament.gov.
za en slakkepos kan gestuur word aan: Konstitusionele Oorsigkomitee, Parlement, Posbus 15, Kaapstad 8000.