MAKADAMIABEDRYF VRA FRIS VERHOGING IN HEFFING

DIE Suid-Afrikaanse Makadamiakwekersvereniging (Samac) se nuwe aansoek om voort te gaan met statutêre heffings op makadamianeute saam met die voorstel vir ’n aansienlike verhoging, is onlangs in die Staatskoerant afgekondig.

Die huidige heffing op makadamianeute beloop 23c/kg vir neute in die dop. Hierdie heffingsooreenkoms verval egter in November. Samac het nou by die Minister van Landbou aansoek gedoen om ’n nuwe heffing van 50c/kg met ’n jaarlikse verhoging van omtrent 6c/kg vir die volgende siklus van vier jaar.

Mnr. Barry Christie van Samac sê die voorgestelde verhoging sal die makadamiabedryf in staat stel om meer navorsing oor die verbouing van makadamias, die bestuur van insekplae en die gesondheidsvoordele van makadamianeute te finansier.

“In hierdie stadium dek die heffing grotendeels die vaste uitgawes van Samac, soos die kantoorruimte en die salarisse van personeel. Min geld bly oor vir navorsing. Ons vaste koste word reeds so goed moontlik bestuur. Die enigste manier om meer geld vir navorsing beskikbaar te maak, is om die heffing te verhoog.” Die nuwe heffing sal die navorsingsbegroting verdriedubbel.

Belanghebbendes het tot 15 Junie om kommentaar op die heffings te lewer. Navrae en kommentaar kan aan mnr. Elekanyani Nekhavhambe by die Nasionale Landboubemarkingsraad gerig word by e-pos enekhavhambe@namc.co.za of tel. 012 341 1115.