BLINK, BLINKER, BLINKSTE
Die Warwick-wynlandgoed buite Stellenbosch is dalk ’n groentjie wanneer dit kom by die kollig op die Old Mutual-trofeewynskou, maar vanjaar is sy wynmaker, Nic van Aarde, huis toe met die gesogte trofee as die suksesvolste produsent op die skou.
Die landgoed het behoorlik geskitter met sy debuut as trofeewenner. Warwick het benewens die topeerbewys ook die trofee vir die beste Sauvignon blanc-Semillonversnit (vir Professor Black 2017) en die trofee vir beste Cabernet franc (Cabernet Franc 2015) gewen.
Beoordelaars het 40 goue medaljes toegeken nadat hulle 977 inskrywings geproe het. Die wyne wat goue medaljes gewen het, is wéér beoordeel om te bepaal wie die beste in die onderskeie klasse is en met trofeë beloon word.
Altesame 90% van vanjaar se trofeewenners het die afgelope vyf jaar ’n goue medalje gewen.
Daaroor sê mnr. Michael Fridjhon, voorsitter van die beoordelaarspaneel: “Daar word van alle ernstige wynkompetisies verwag om as ‘talentsoekers’ op te tree en die mark voor te spring met die identifisering van kelders wat in die hoofstroom hoort of veranderinge wat teweeg gebring word wanneer leidende wynmakers hul werkplek verander. Vanjaar se resultate pas hierdie profiel byna perfek.”
Die Shiraz-kategorie het die meeste inskrywings (106) gelok, gevolg deur Cabernet Sauvignon (94 inskrywings). Die inskrywings in die Chenin blanc-kategorie het met 26% gegroei teenoor verlede jaar.
Wynliefhebbers sal die kans kry om die wenwyne te proe in Kaapstad (13 Junie) en Johannesburg (15 Junie). Proeë sal ook in sekere Makro-winkels aangebied word.
Kaartjies is deur Computicket te koop.