LOONPROTES TREF DIE SONDAGSRIVIERVALLEI

STAKENDE seisoenwerkers by ’n pakhuis van die Sondagsrivier-sitrusmaatskappy (SRCC) op Kirkwood het op 25 Mei ander werkers gekeer om werk toe te gaan weens ontevredenheid oor lone.

Die meeste van die pakhuiswerkers bly in die Moses Mabhida-woongebied, waar talle seisoenswerkers van die pakhuis paaie geblokkeer het.

Volgens mnr. Hannes de Waal, besturende direkteur van die Sondagsriviersitrusmaatskappy, gaan werksaamhede by ander pakhuise in die vallei voort.

“Ons het ’n goeie verhouding met die gemeenskap en die vallei is in die algemeen rustig.”

VERWAGTINGE

Volgens De Waal is werkers ontevrede oor ’n salarisverhoging van 8% wat die maatskappy reeds verlede jaar aangebied het. Hulle eis ’n verhoging van 13%. Die maatskappy meen egter so ’n verhoging is te hoog.

Nog ’n probleem is dat die seisoenswerkers nie deur ’n unie verteenwoordig word nie. Die maatskappy gaan egter steeds sy bes probeer om die werkers tegemoet te kom.

VERBETER KLIMAAT

De Waal meen ’n klimaat van ontevredenheid het tot die protesoptrede gelei.

“Die klimaat wat tans in die landbou geskep word met gesprekke oor onteiening sonder vergoeding en besluite oor die nasionale minimum loon wat nie goed oorgedra is nie, is glad nie voordelig vir die bedryf nie. Dit veroorsaak geweldig baie onsekerheid,” sê De Waal.

Hy sê weens die verwagtinge wat geskep is, sal daar in die toekoms al hoe meer druk op werkgewers wees om deeglik met hul werknemers te kommunikeer en hoop te skep vorentoe.

“Ons gaan nou nouer met gemeenskappe moet saamwerk om te weet hoe almal dink sodat ons nie uiteindelik vyandig teenoor mekaar staan nie,” sê De Waal.