LANDBOUREUS OPEN HOOFKANTOOR VIR AFRIKA
DIE internasionale landboumasjienerievervaardiger AGCO, wat by die ontwikkeling van landbouparke reg oor Afrika betrokke wil raak, het pas sy nuwe Afrika-hoofkantoor in Kempton Park geopen.
Die maatskappy vervaardig en versprei trekkers en werktuie van onder meer Challenger, Fendt, Massey Ferguson en Valtra, asook GSI-graansilo’s en Fuse-presisietegnologie.
“Die nuwe hoofkantoor vorm deel van AGCO se deurlopende infrastruktuurontwikkeling op die vasteland. Dit sluit onder meer in ’n nuwe onderdelepakhuis in Johannesbrug, die AGCO Future Farm and Training-sentrum in Zambië en ’n samewerkingsooreenkoms om trekkers in Algerië te vervaardig,” het mnr. Martin Richenhagen, voorsitter en hoof- uitvoerende beampte van AGCO, gesê.
“AGCO, met ’n wêreldwye omset van VSA$ 8,3 miljard (R103,3 miljard) onderneem tans grootskaalse beleggings in Afrika om voedselsekerheid en volhoubare produktiwiteit met tegnologiese vernuwing te bevorder. Afrika speel toenemend ’n sleutelrol om die wêreld se groeiende bevolking te voed en om die wêreldwye uitdaging van voedselsekerheid die hoof te help bied,” sê hy.
AGCO is ook van plan om sy betrokkenheid by die ontwikkeling van landbouparke regoor die vasteland te verskerp. “Met ons reeks produkte, dienste en kennis meen ons dat ons in die posisie is om ’n bydrae tot hierde opwindende inisiatief in die landbou en landelike ekonomiese transformasie te lewer,” het mnr. Nuradin Osman, ondervoorsitter en bestuurder vir Afrika van AGCO, gesê.
In ’n onderhoud met Landbouweekblad het Richenhagen gesê die maatskappy se klem is op groter boere in Suid-Afrika gerig. Die maatskappy het ’n markaandeel van sowat 15% (volgens verkope). “Dit is egter ons doelwit om binne die volgende paar jaar hierdie aandeel tot 25% te laat groei deur middel van ons samewerkingsooreenkoms met ons plaaslike verspreider, BHBW, ’n konglomerasie van die plaaslike maatskappy Barloworld en die Duitse BayWA Ag.”
Die maatskappy wil ook sy handelaarsnetwerk uitbrei om boere beter te kan bystaan. “Ons het tans sowat 65 handelaars in Suid-Afrika, maar daar is ook ’n groter klem om meer betrokke te raak in Afrika,” het Osman gesê.
Hy het gesê AGCO het 14 lande, onder meer die SentraalAfrikaanse Republiek, Zimbabwe, die Ivoorkus, Mosambiek, Ghana, Nigerië, Algerië en Marokko, geïdentifiseer as toekomstige sterk markte.
“Ons belegging in die pakhuis, wat met die jongste tegnologie toegerus is, sal ons ook in staat stel om hierdie markte vinnig te bedien. Terwyl dit vir Suid-Afrikaanse boere ’n groot voordeel is om die pakhuis hier te hê, sal dit ook boere in ander Afrikalande help omdat dit die omdraaityd vir hulle ook baie korter gaan maak,” hetOsmangesê.