DATATEGNIEKE VIR CHENIN SE AROMAS INGESPAN
Die aromas van Suid-Afrika se Chenin blanc-wyne kan met 266 sensoriese woorde beskryf word.
Navorsers aan die Universiteit Stellenbosch (US) het dié woorde deur ’n studie bepaal. Hulle het die woorde gebruik om ’n kleurgekodeerde aromawiel en unieke woordeskat vir die beskrywing van Chenin blancs te ontwikkel.
Dr. Hélène Nieuwoudt, ’n senior navorser aan die US se departement wingerd- en wynkunde, sê Chenin blancs word deur uiteenlopende style gekenmerk en kompleksiteit is ’n belangrike dryfveer.
Die style wissel van vars en lig, tot meer kompleks met ’n kenmerkende houtagtige karakter. “Chenin blanc bied iets unieks aan verbruikers. Danksy ons navorsing kan ons die uiteenlopende sensoriese kenmerke visueel uitbeeld,” sê Hélène in ’n verklaring deur die US.
Die span wat die navorsing gedoen het, het bestaan uit mnr. Carlo Valente, meestersgraadstudent aan die US se instituut vir wynbiotegnologie (IWBT), Hélène en prof. Florian Bauer, wat sy studieleiers is, asook mnr. Fritz Venter, ’n doktorale student aan die departement inligtingwetenskap, en sý studieleier, prof. Bruce Watson.
Die span het data in die jaarlikse Platter-wyngids gebruik om die sensoriese kenmerke van Chenin en dié van Sauvignon blancs te bepaal. Laasgenoemde is luidens die verklaring by die studie ingesluit omdat dit reeds goed beskryf is en gebruik kon word om die bevindings oor Chenin blanc te staaf.
In die wyngids beoordeel ’n paneel wynkenners wyne op grond van hul sensoriese kenmerke en gehalte. Die navorsers het tegnieke, wat gewoonlik gebruik word om “groot data” te ontleed en onder meer kubermisdadigers vas te trek, ingespan om die sensoriese wynbeskrywings in die gids te ontleed.
Sover bekend is dit die eerste studie in sy soort waarin wynstyle met behulp van dié tegnieke bepaal is, sê Hélène.
In die gids is 4 352 Sauvignon blancs met 71 892 woorde beskryf en 2 746 Chenin blancs met 38 403 woorde. Daaruit het die navorsers net die woorde gebruik wat aromakenmerke beskryf, waarvan daar 266 vir Chenin blancs en 250 vir Sauvignon blancs was.
“Hoewel sommige Chenin blanc-wyne soortgelyke sensoriese beskrywings met Sauvignon blanc-wyne gemeen het, toon ons studie dat twee kenmerkende wynstyle onderskei kan word wanneer die data gevisualiseer word.”
Hélène sê die bevindings hou belangrike gevolge vir Chenin blanc-wyne se etikette in.
Luidens die verklaring is daar die afgelope tyd hernude belangstelling in die sensoriese kenmerke van Chenin blanc, danksy die kultivar se ekonomiese belang vir die plaaslike mark, asook die uitvoermark.
Chenin blanc is reeds in die 17de eeu deur Nederlandse setlaars in Suid-Afrika geplant. Vandag verteenwoordig dit sowat 18% van alle plaaslike wingerde. Danksy sy hoë opbrengs en vermoë om in warm en droë toestande te gedy, word dié kultivar in uiteenlopende gebiede in Suid-Afrika verbou.