BONNIEVALE SE KONFYTKONINGIN
Op Skoolplaas kook Heliëtte Smit konfyt, souse, smere en jellies en mense wat al haar tuisgemaakte produkte geproe het, sê gereeld dit is die heel lekkerste.
Sedert 2009 bedryf Heliëtte Smit van Bonnievale Toeka tot Nou, haar konfytbesigheid. Dit is in haar plaaskombuis op hul plaas Skoolplaas waar sy konfyt kook dat die stoom trek.
Sy werk op vier gasstofies op ’n spesiale lae tafel wat haar seun vir haar gemaak het toe hy nog op skool was – in seisoentyd tot vyf dae per week. Sy kook konfyte, jellies en slaaisouse van omtrent enige vars produk – druiwe, tamaties, pynappels, rissies, noem maar op – en verkoop dit aan padstalle tot aan die Weskus.
“Ek het drie kinders binne twee en ’n half jaar gehad. Ek was dus heeltemal uit die mark en boonop B.C.( before computers). Daarom het ek op klein skaal begin konfyt kook. Ek sal in my boeke moet gaan kyk hoeveel vrugte en groente ek nou verwerk, maar ek kan jou sê ek het verlede jaar 13 000 glasbottels (van 260 ml elk) aangekoop en gevul.”
Heliëtte en Jannie, haar man met wie sy al 37 jaar getroud is, het mekaar deur Landbouweekblad se “Opsitkers” ontmoet. Hul jongste seun, Russouw, is nou ook al op die plaas betrokke. Hulle verbou appelkose, groentesaad, botterskorsies, skorsies, wyndruiwe en uitvoerpruime. Hul middelkind, Kowie, is bestuurder op die buurplaas Janharmsgat. Hul dogter, Hilandi, sê graag haar ma maak “rof-en-tjommel-kos” omdat sy nie ’n resep volg nie, maar suiwer op gevoel kook. Die meeste kos in hul huis – selfs die kouevleise, brood en kleinkoekies – word tuisgemaak.