Oesskatting: Mielie-oes nóg groter
TERWYL die stroopproses van mielies in die somerreënstreke nou volstoom aan die gang kom en tot in Julie sal duur, het die Nasionale Oesskattingskomitee (NOK) die verwagte kommersiële oesskatting met ongeveer 81 800 ton verhoog tot 12,909 miljoen ton.
Die geskatte oes is 23% kleiner as verlede jaar se oes, wat op 16,820 miljoen ton die grootste oes tot nog toe was.
Die drie belangrikste mielieproduserende gebiede, naamlik die Vrystaat, Mpumalanga en Noordwes, gaan na verwagting 81% van vanjaar se oes oplewer, sê die NOK.
Graan SA sê in ’n produksie-opname goeie oeste word in die algemeen in die Vrystaat, Mpumalanga, Limpopo en die Noord-Kaap verwag.
Mielies wat laat geplant is in distrikte, soos Sannieshof, Schweizer-Reneke en Delareyville in Noordwes, het rypskade gekry. Die graad van die skade sal egter eers teen strooptyd bepaal kan word.
Graan SA verwag oor die algemeen ondergemiddelde tot gemiddelde mielie-oeste in Noordwes, want die produksiejaar het moeilik begin, met droogte- en hitteskade.
Die skatting van die oppervlakte onder mielies is 2,319 miljoen ha, terwyl die verwagte opbrengs 5,57 t/ha is.
Die produksieskatting vir wit mielies is 6,701 miljoen ton en die opbrengs word op 5,28 t/ha geraam.
Vir geel mielies is die produksieraming 6,207 miljoen ton met ’n opbrengs van 5,91 t/ha.
STROOP VAN SOJA, SONNEBLOMME
In die somerreënstreke het die meeste boere reeds hul sojabone klaar gestroop, terwyl die stroop van sonneblomme ver gevorder het. Die NOK het sy skatting vir sonneblomsaad onveranderd gelaat op 792 255 ton, met ’n opbrengs van 1,32 ton/ha.
Die raming vir sojabone is ook onveranderd op 1,430 miljoen ton – die grootste oes wat tot nog toe in die geskiedenis van Suid-Afrika gelewer is.
Die geskatte oppervlakte beplant met sojabone is 787 200 ha en die verwagte opbrengs is 1,82 t/ha. Die verwagte grondbone-oes is met 15,14% of 12 200 ton afwaarts aangepas. Vir grondbone is die oppervlakteskatting 56 300 ha, terwyl die verwagte opbrengs 1,21 t/ha is.
Graan SA sê in sy oorsig sojaboonoeste is wisselvallig, met gemiddelde tot bogemiddelde oeste in sommige dele van die Vrystaat, Mpumalanga en KwaZulu-Natal.
In Noordwes was sowat 70% van die sojabone verlede week klaar gestroop en die oeste is tot dusver gemiddeld tot ondergemiddeld. Boere in die Noord-Kaap en dele van die Oos-Vrystaat het laer as verwagte opbrengste aangeteken.
Ryp het in dele van Noordwes, die Vrystaat en Mpumalanga voorgekom. Beperkte skade is aangemeld by sonneblomme wat nog in die blomstadium was.
In Limpopo vorder die stroopproses stadig en oeste op droëland is in die algemeen ondergemiddeld. Sclerotinia het skade aan son-
neblom- en sojaboonaanplantings in Noordwes, die Vrystaat en Mpumalanga veroorsaak.
Skade weens die voorkoms van Alternaria is ook in die sentrale en noordwestelike dele van die Vrystaat aangemeld.
WES-KAAPSE BOERE PLANT IN GELOOF
In die Wes-Kaap het talle boere reeds hul wintergraan geplant, met saad wat tans in die grond lê en wag op reën, sê Graan SA.
Volgens die organisasie se opname in die provinsie wissel weerstoestande van droog tot baie droog in die oostelike dele van die Suid-Kaap en die noordelike dele van die Swartland.
Sommige boere in die Overberg is byna klaar geplant, terwyl ander besluit het om nie verder te plant tensy hulle reën kry nie.
“Van die graan het al opgekom, ander kom nou op en ander lê in die grond. Daar is ook graan wat begin opkom het, maar gevrek het weens die droë en warm toestande,” luidens die opname.
Die organisasie sê toestande lyk taamlik gunstig in die suidelike dele van die Swartland en die graan kom mooi op.
Boere vorder goed met die aanplanting van kanola, lupiene en gars en is in sekere gebiede reeds klaar geplant. Op sekere plekke moet heelwat koring nog geplant word. Boere is bekommerd oor reën, aangesien die einde van die optimale planttyd al hoe nader kom.