Slenkdalkoors: Ent nou!
VEEBOERE is gewaarsku om betyds voorkomende maatreëls te tref ná ’n geïsoleerde voorval van slenkdalkoors in die Vrystaat.
Dr. Pieter Vervoort, voorsitter van die nasionale dieregesondheidsforum (NAHF), sê ná die onlangse amptelike kennisgewing oor ’n uitbreking van slenkdalkoors in die omgewing van Jacobsdal moet boere besef dit is riskant om nie skape, bokke en beeste in te ent nie, aangesien grootskaalse verliese en veral aborsies kan volg.
Volgens Vervoort is geen nuwe gevalle van die siekte die afgelope week aangemeld nie. “Ons is onkant betrap deur die berig oor dié voorval van die siekte, aangesien dit aan die einde van die reëntyd in die sentrale binneland is,” sê hy. “Die vorige keer toe slenkdalkoors aan die einde van die somer voorgekom het, was die uitbreking daarvan in die daaropvolgende reëntyd katastrofies.”
Vervoort het veeboere aangemoedig om hul kuddes betyds in te ent sodat ’n groot dierebevolking met goeie immuniteit teen slenkdalkoors enige moontlike verspreiding van die siekte kan keer.
Mnr. Johan van den Berg, klimatoloog by Santam Landbou, sê hoewel dit nog te vroeg is om juiste voorspellings vir die nuwe reëntyd te maak, kan ’n El Niño-verskynsel in die binneland voorkom, wat tot ’n midsomerdroogte kan aanleiding gee.
Dit beteken die gevaar van siektes wat met nat toestande verband hou, word beperk. Hy waarsku egter dat goeie reënneerslae in die voorsomer van September en Oktober vanjaar die pan- en damvlakke kan aanvul. Dit is die ideale teelaarde waar muskiete uitbroei sodra dit warmer word.
Prof. Gareth Bath, voorsitter van die veewelsyn-koördineringskomitee, waarsku as alle boere op verdere uitbrekings wag voor hulle hul diere inent, kan kwaai verliese voorkom. Dit is omdat Onderstepoort Biologiese Produkte, wat die entstof vervaardig, dalk nie in die oorweldigende vraag na entstof sal kan voorsien nie. Volgens hom is die maak en toets van entstof ’n veeleisende proses wat nie op kort kennisgewing tot miljoene dosisse verhoog kan word nie.
Om die risiko te verlaag, behoort alle nie-dragtige herkouervee in die komende winter ingeënt te word. Vir sekerheid op langer termyn moet alle vervangingsvee voor dektyd elke jaar ingeënt word, aangesien doeltreffende immuniteit in die meeste gevalle waarskynlik lewenslank sal wees.
“Boere word sterk aangeraai om hul plaaslike veeartse te raadpleeg om oor die risiko, die gebruik van die regte entstowwe en om op die beste inentingspogram vir hul plaas te besluit,” sê Bath.
Volgens die Departement van Landbou, Bosbou en Visserye het 8 800 diere in 2010 weens die siekte gevrek en ’n verdere 3 600 van Januarie tot Augustus 2011.
Sowat 26 van die 275 mense wat die siekte opgedoen het, het gesterf, sê die departement.