Só werk landbou vir veiliger plase
TLU SA het verlede week die sluier gelig oor sy eie toepassing van ’n nasionale landbouveiligheidstrategie (NLVS) wat deur al vier nasionale landbou-unies goedgekeur is.
Dit is ter ondersteuning van die polisie se eie landelike veiligheidstrategie wat op 1 April in werking getree het.
Die NLVS is vroeër vanjaar binne die Eenheidsforum vir die Landbou (Asuf) voorgelê en deur Agri SA, die African Farmers’ Association of South Africa (Afasa), TLU SA en die National African Farmers’ Union (Nafu) goedgekeur.
“Daar is nou die potensiaal vir ’n eenvormige benadering,” sê mnr. Henry Geldenhuys, ondervoorsitter van TLU SA en ook voorsitter van dié organisasie se veiligheidskomitee. “Ons het reeds ’n versoek tot mnr. Bheki Cele, Minister van Polisie, gerig om die veiligheidstrategie met hom te bespreek.”
Die strategie maak onder meer voorsiening daarvoor dat plaaslike sekerheidsmaatskappye betrek word om veiligheidsmaatreëls aan te vul en om plaaslike forums te benut waarin alle belanghebbendes by veiligheid betrek word.
OP GRONDVLAK
Genl.maj. Chris van Zyl, adjunk-hoofbestuurder van TLU SA, sê gemeenskapsveiligheidskomitees (GVK’s) op grondvlak sal bestaan uit onder meer die polisie, private sekerheidsdienste, verkeerspolisie, die brandweer, korrektiewe dienste, jagen
skietverenigings, plaaswagte, boere, plaaswerkers en vredesbeamptes.
“Op plaaslike vlak sal die GVK’s verantwoordelik wees om inligting in te samel, operasies uit te voer en tegniese steun te verskaf. Alle misdade wat volhoubare en winsgewende landbou bedreig — van geweldsmisdade en roof tot veediefstal en ander diefstal, betreding, onwettige besettings, brandstigting en selfs onwettige protesoptrede — word daarby ingesluit.”
Volgens Van Zyl het TLU SA met projekte by Muldersdrift en Cullinan buite Pretoria, Dullstroom, Mokopane, Lichtenburg, Utrecht en Barkly-Oos begin om te kyk watter lesse daar te leer is. Die doel daarvan is ook om die NLVS te hersien indien nodig, ’n bewustheid sywaarts en opwaarts te skep, materiaal vir ’n gids oor veiligheid in te samel en voorbeelde aan die media en landboubesigheidsektor te kan voorhou.
INTEGRASIE
Die NLVS maak ook voorsiening vir skakeling op verskillende vlakke, soos met staatsdepartemente op ministeriële vlak, ’n ministeriële adviesraad waarby landbou-unies ook betrek is en ’n sekretariaat wat die onderskeie rade bystaan met inligting, openbare skakeling en administrasie.
Oor die polisie se eie veiligheidstrategie sê Van Zyl op papier is dit ’n groot stap vorentoe en daar is baie gunstige aspekte.
“Ek is net bekommerd in watter mate dit op plaaslike polisiekantoorvlak moontlik gaan wees om plaasaanvalle as voorrangsaak te hanteer saam met ander misdade wat ook voorrang moet geniet. Ek sou graag wou hê dat daar ten minste versterkings kom vir die gebiede met ernstige misdaadvlakke, maar selfs dit gebeur nie.”
Volgens TLU SA se statistieke is vanjaar reeds 23 moorde in 157 plaasaanvalle gepleeg.