GRAANBOERE SE BEDRYFSUITGAWES STYG

Graanboere se bedryfsuitgawe het teenoor die ooreenstemmende tyd verlede jaar gestyg, sê mnr. Corné Louw, senior ekonoom by Graan SA. Die saadkoste van mielies het sowat 6% duurder geword, sonneblom sowat 5,1%, sojabone slegs sowat 0,5% en sorghum sowat 7,5%.

Die koste van brandstof het met 13% teenoor die ooreenstemmende tyd verlede jaar gestyg.

“Tans word daar verwag dat die dieselprys op 6 Junie met 86 sent per liter kan toeneem. Dit sal ’n rekord vir die groothandelsprys in Gauteng wees,” sê Louw.

Plaaslike kunsmispryse is gemiddeld tot 8,2% hoër teenoor verlede jaar die ooreenstemmende tyd. Dit vergelyk goed met die internasionale neigings. “Internasionale landbouchemiese pryse het skerp toegeneem, veral in China, waar die regering streng omgewings wetgewing tans toepas. Talle aanlegte word as gevolg daarvan gesluit en dit beperk die vervaardiging en aanbod. Chinese prysstygings, na gelang van die aktiewe bestanddeel, het gewissel van 10,1% tot 65%,” sê Louw.

Luidens sy verslag het plaaslike pryse nie in dieselfde mate toegeneem nie aangesien baie van die multinasionale landbouchemiese maatskappye se produkte nie uit China kom nie.

“Pryse van multinasionale maatskappye het met gemiddeld 6% toegeneem, terwyl dié van generiese maatskappye met sowat 20% gestyg het.”

’n Klein bietjie goeie nuus is dat meganisasiekoste redelik in toom bly. Pryse van trekkers het op ’n jaargrondslag met gemiddeld 5% gedaal. Stroperpryse het egter met 4% gestyg, terwyl pryse van werktuie sywaarts beweeg het.