Nuttig & nuut
Danksy die onderneming Damsak se nuwe 500 literof 1 000 liter-sakke kan ’n boer nou kleiner hoeveelhede water op sy plaas met sy bakkie verskuif.
Die 500 liter-sak pas op enige bakkie, terwyl die 1 000 liter-sak op die bak van die meeste handelsmerke se dubbel kajuit bakkies pas.
Die sakke kan gebruik word om byvoorbeeld water na ’n veesuiping of verblyfgeriewe vir toeriste of jagters aan te ry, vir die blus van ’n vuur en om oeste te bespuit. Dit kan ook gebruik word om ander vloeistowwe, soos vloeibare kunsmis en groot hoeveelhede wyn, te vervoer. Die sakke kan verder gebruik word om reënwater mee op te vang.
Die sakke is van sterk PVC-seilmateriaal gemaak wat ultraviolet-gestabiliseer is.
Die 500 liter-sak weeg sowat 4 kg en die groter sak sowat 5 kg. Die 500 liter-sak se afmetings is 1,025 m x 1 m x 0,45 m en dié van die 1 000 liter is 1,5mx1mx0,475m.
Die voordeel van ’n sak bo ’n vaste plastiekhouer is dat dit ná die vervoer van ’n vloeistof opgevou en agter die sitplek gebêre kan word. Die bak kan dan vir ’n ander vrag gebruik word.
Die kraan om vloeistof mee uit te tap, word gewoonlik só geïnstalleer dat dit van die agterkant van die bakkie af gebruik kan word. Die kraan kan egter op enige plek geïnstalleer word na gelang van die boer se behoeftes. PRYS: R1 194,85 vir die 500 liter-sak en R1 619,20 vir die 1000 liter-sak (afleweringskoste uitgesluit).