Tiger betaal dividend ondanks listeriose-terugslag
TIGER BRANDS gaan steeds ’n tussentydse dividend van 378 sent per aandeel uitbetaal. Dit is ondanks verliese van R365 miljoen tot dusver weens die uitbreking van listeriose wat tot die sluiting van dié voedselreus se Enterprise-aanlegte in Maart en die onttrekking van kouevleisprodukte op winkelrakke gelei het.
Met die aankondiginging van sy tussentydse resultate vir die halfjaar tot einde Maart, het die maatskappy gesê die jaar het met moeilike handelstoestande begin. Sy inkomste was 4% laer op R15,7 miljard vergeleke met die ooreenstemmende tydperk in die vorige boekjaar. Die bedryfskoste het met 8% gedaal tot R2 miljard. Die wins voor belasting het met 18% gedaal tot R1,9 miljard.
Die R365 miljoen wat die ontdekking van listeriose Tiger Brands tot dusver gekos het, sluit nie die verlies aan verkope in wat steeds voortduur weens die aanlegte wat gesluit bly nie.
Mnr. Lawrence MacDougall, uitvoerende hoof van die maatskappy, sê hulle aanvaar die aanlegte sal nog tot 30 September gesluit bly. Die waarde van bevrore voorraad wat steeds getoets word, beloop sowat R183 miljoen. Die toetsuitslae sal bepaal wat daarvan word.
MacDougall het gesê die maatskappy oorweeg die beste moontlike benadering tot die groepsregsgeding sodat dit “sensitief en verantwoordelik gehanteer word met inagneming van al die feite. Die regsverteenwoordigers voer gesprekke om moontlike samewerking te ondersoek. ’n Aankondiging daaroor sal volg sodra ’n besluit geneem is.”
Hy het gesê Tiger Brands het te alle tye maatreëls gereed om aan die nodige standaarde en beste praktyke vir voedselveiligheid te voldoen. “Ons is daartoe verbind om verbruikers se gesondheid en veiligheid bo alles te stel. Die ontdekking van die ST6-stam van die Listeria-bakterie in ons fabriek in Polokwane was ’n groot teleurstelling juis omdat ons alles moontlik doen om aan die vereiste standaarde te voldoen. Ons werk openlik en deursigtig saam met die betrokke staatsdepartemente, reguleerders en ander betrokkenes.
“Die direksie en bestuur is diep bedroef oor die feit dat mense siek geword het en daar lewensverlies was. Ons dra ons diepe meegevoel oor aan diegene wat geliefdes verloor het,” het MacDougall gesê.