Versigtig met hidrobreking, waarsku Verenigde Nasies
HIDROBREKING? – Nie so haastig nie, waarsku die Verenigde Nasies in sy verslag oor die voor- en nadele van hidrobreking (ter wille van die ontginning van skaliegas).
Hierdie verslag – saamgestel deur die Verenigde Nasies se Konferensie vir Handel en Ontwikkelingsaangeleenthede (Unctad) – is uitgereik enkele weke nadat mnr. Gwede Mantashe, Minister van Minerale Hulpbronne, aangekondig het dat aansoeke om skaliegaseksplorasie in die Karoo bespoedig sal word.
Mnr. Derek Light is die regsverteenwoordiger vir honderde grondeienaars en verskeie landbouverenigings (waaronder Agri Oos-Kaap) wat binne die huidige regulatoriese raamwerk teen skaliegas-eksplorasie in die Karoo gekant is. Light het gesê hoewel die Unctad-verslag nie risiko’s op ’n plaaslike of streeksvlak oorweeg nie, stem dit grotendeels ooreen met ander verslae oor hidrobreking.
“Wat verwelkom word, is dat die verslag die lande wat hul toegang tot nuwe energiebronne wil verhoog, waarsku om hidrobreking met versigtigheid te benader. “Dit is wat ons bepleit.” Light was die regsverteenwoordiger in die saak waarin die Oos-Kaapse Hooggeregshof verlede Oktober ’n besluit van die Minister van Minerale Hulpbronne in 2015, om die hidrobrekingsregulasies te promulgeer, terugwerkend ter syde gestel het.
Die hof het saamgestem met die beswaardes, verteenwoordig deur Light, dat die promulgering onder meer teenstrydig was met die bepalings van die Nasionale Wet op Omgewingsbestuur en ook die Nasionale Waterwet.
Die nodigheid vir doeltreffende wetgewing en/of regulasies en monitering word in die Unctad-verslag beklemtoon.
“Die belangrikheid om vooraf alle inligting op grondvlak te bekom sodat die impak van ontginning op die betrokke omgewing gemonitor en bepaal kan word, word ook genoem,” sê Light.
Hy vind dit bemoedigend dat waterbronne ook in die verslag aandag geniet.
“Die verslag beklemtoon die risiko van seismiese aktiwiteit, waterbesoedeling en die nadelige impak wat die hoë waterverbruik op droogtegeteisterde gebiede soos die Karoo kan hê.”
Werkskepping word ook gemeld. “Die verslag gee te kenne dat die skaliegasbedryf tot 80 000 werkgeleenthede in Amerika geskep het, maar daardie inligting word betwyfel. Dit blyk ook dat 28 000 werkgeleenthede verlore gegaan het.
“Vergelyk dit nou met die voorspellings van die ekonome van Shell wat 400 000 werkgeleenthede in Suid-Afrika voorspel het.”
Light het voorts verwys na die strategiese omgewingsassessering vir skaliegas (SEA) wat deur die Wetenskaplike en Nywerheidnavorsingsraad gedoen is: “Die SEA het bevind daar sou minder as 3 000 werkgeleenthede geskep word – en slegs ongeveer 900 daarvan sou vir die plaaslike werksmag beskikbaar wees.”
Met verwysing na die moontlike omvang van die gasreserwes in Suid-Afrika, waarsku die verslag dat dit slegs skattings is en dat uitgebreide navorsing vooraf gedoen moet word om te bepaal wat die omvang van die gasreserwes is.
“Die navorsing waarop ons aangedring het en wat nou gedoen word, het tot nou toe geen ekonomies ontginbare gasreserwes in Suid-Afrika geïdentifiseer nie,” sê Light.