90 JAAR GELEDE
Uit: Die Landbouweekblad, 27 Junie 1928 MEV. JORDAAN, ACVV-BAANBREKER
Dat die Afrikaanse Christelike Vrouevereniging (ACVV) van Kaapland byna 25 jaar gelede tot stand gekom en vandag reeds 120 takke met sowat 7 000 lede in die provinsie het, is veral ook te danke aan mev. Gert Jordaan, hoofvoorsitter van die vereniging en boervrou van die plaas Hooggenoeg in die distrik Cradock.
Mev. Jordaan het haar sedert die Anglo-Boereoorlog (18991902) beywer vir die lewering van maatskaplike sorg aan mede-Afrikaners. Verskeie vroue-organisasies is destyds in die Kaaplandse binneland gestig om hulp aan die Boerekrygsgevangenes te verleen.
Toe die Britse owerheid tydens die oorlog van Cradock se mense as “ongewenstes” (undesirables) na die kusdorp Port Alfred weggevoer het, het mev. Jordaan geld en slagvee ingesamel en vir hulle gestuur.
Aan die jong Boerekrygsgevangenes op Groenpunt, Kaapstad, het sy skoolbehoeftes en lekkernye voorsien.
Sy het ook die konsentrasiekamp in Port Elizabeth besoek en daar hulp aan gevangenes verleen.
Ná die oorlog het sy haar daarvoor beywer dat die verskillende vrouehulporganisasies in een liggaam saamgesnoer word. Sy het voorgestel dat dit die Afrikaner-vrouevereniging heet, met die leuse “vir taal, volk en kerk”.
(Die Zuid-Afrikaansche Christelijke Vrouwen Vereniging — die latere ACVV — is op 1 September 1904 in Kaapstad gestig. Die stigtingskongres was die volgende jaar en die organisasie se grondwet is toe aangeneem.)
Mev. Jordaan is die dogter van mnr. Pieter de Wet, in lewe bekende boer van die distrik Worcester. Sy is getroud met mnr. Gert Jordaan, boer en skrywer van die boek Hoe Zij Stierven.