Grootpaaie hou grootste gevaar vir vee in

MISDADIGERS wat beeste lewend opkap, is nie opportunistiese diewe nie, maar vorm deel van georganiseerde misdaadnetwerke, sê mnr. Willie Clack, voorsitter van die nasionale veediefstalvoorkomingsforum.

“Hierdie ouens is amper soos transitorowers. Hul aanvalle op beeste is nie impulsiewe besluite nie – hulle bepaal hul teiken lank voor die tyd.

“Hoe nader jou beeste aan ’n pad loop, hoe groter is jou blootstelling

daaraan – veral naby ’n teerpad. En hoe besiger die pad, hoe gevaarliker vir jou beeste.”

Clack sê boere se beste beskerming is fyn monitering, patrollies en ander misdaadvoorkomingstrategieë.

“As jy beeste oornag in ’n kraal toemaak, lokaliseer jy hulle vir ’n dief op ’n punt. Jy moet maar gedurig gaan kyk. Naby Carletonville het ’n boer weerkaatsers op al sy drade aangebring. As jy saans daar ry en een draad is af, sien jy

dit onmiddellik en dan kan jy gaan ondersoek instel.

“Doen patrollies, skuif die beeste gedurig rond, raak betrokke by jou plaaswagte – dis die tipe dinge wat jy maar moet doen,” sê hy.

Clack noem dat navorsing deur een van sy kollegas ’n verband trek tussen dié kapbendes en geweldsmisdaad, en dat wrede veediefstal nie uniek aan Suid-Afrika is nie.