BOERE EN POLISIE MOET SAAMWERK TEEN VEEDIEWE
VEEDIEFSTAL was hoog op die agenda op onlangse provinsiale vergaderings van die Rooivleisprodusenteorganisasie.
Op die vergadering van die RPO in Noordwes (NWRPO) het mnr. Sakkie van Zyl, voorsitter, gesê dis waarskynlik die grootste bron van frustrasie vir veeboere in die provinsie.
“Voorvalle van veediefstal het van 2016 tot 2017 met 22% in die provinsie toegeneem, wat Noordwes een van die provinsies maak waar hierdie misdaad die kwaaiste toegeneem het,” het Van Zyl gesê.
Hy het gesê die NWRPO is deeglik bewus van veeboere se frustrasie met ontoereikende ondersoeke na voorvalle van veediefstal. “Ons gee boere die versekering dat ons hierdie kwessies op die hoogste moontlike vlak met die SuidAfrikaanse Polisiediens, veediefstaleenhede en die Nasionale Vervolgingsgesag bespreek.”
Hy het gesê dit is bemoedigend dat sukses met die aankeer van veediewe en terugvind van vee die afgelope paar maande aangeteken is. Boonop het strenger maatreëls by vetveeveilings daartoe gelei dat afsetpunte vir gesteelde vee verminder het.
‘MAKLIKE MISDAAD’
“Veediefstal is vandag ’n maklike misdaad,” meen lt.kol. Johan Smit, die WesKaapse polisiekoördineerder vir veediefstal. Hy het op dié provinsie se onlangse RPOvergadering op Moorreesburg gesê het dit word meestal snags gepleeg en dit kan dae duur voordat boere besef van hul diere is gesteel. Hy sê die min leidrade word gewoonlik nóg minder met verloop van tyd. Boere moet daarom alles in hul vermoë doen om die polisie te help.
“Dit is ’n groot probleem om met min leidrade gesteelde vee op te spoor, maar dit is belangrik dat boere alle veediefstalvoorvalle aanmeld sodat ‘steelpatrone’ vir bepaalde streke saamgestel kan word,” sê hy.
Verder kan boere help deur onder meer vee gereeld te tel, goeie veeregisters te hou, alle vee te merk, te wéét wie jy aanstel om met jou vee te werk, en te sorg dat daar minstens een betroubare werker op die plaas is wat insae het van wat onder werkers en ander mense in die omgewing gedoen en gesê word.
“Dit gebeur soms dat ’n boer sy vee een keer in maande tel, agterkom diere is weg en dit dán by die polisie aangee. As die polisie dan met geen leidrade weens die lang tydsverloop nie hond haaraf kan maak nie, word dikwels gesê die polisie doen niks nie.”
TATOEËRING WERK
Van Zyl sê boere moet seker maak hul diere is deeglik en duidelik gemerk.
“Dit beteken nie net dat diere gebrandmerk moet word nie, maar dat diere van ’n jong ouderdom getatoeëer moet word. Trouens, staatsaanklaers met wie die NWRPO gereeld skakel, meen tatoeëring is moontlik waardevoller as ’n brandmerk omdat dit ’n duideliker merk laat. Dit moet boere egter nie verhinder om ook hul diere te brandmerk soos wetgewing vereis nie,” sê hy.
Verder moet boere erns maak om te verseker dat veediefstalinligtingsentrums aktief is en gereeld vergader.
“Dit is die enigste forum waar boere, die polisie, veediefstaleenhede en die vervolgingsgesag bymekaar kan kom om kwessies te bespreek. Laat ons dus nie nalaat om gereeld hierdie vergaderings te hou om veediefstal in die provinsie beter te bekamp nie.”
‘Dit is ’n groot probleem om met min leidrade gesteelde vee op te spoor.'