MOEILIKE BESLUITE OOR GRAANAANPLANTINGS WAG
MET die stroopproses van mielies wat in die somerreëngebied begin het en ’n verwagte kommersiële oes van 12,909 miljoen ton, lê moeilike besluite vir graanboere oor die nuwe produksiejaar voor.
Mnr. Pieter Smit, bemarkingsbestuurder van Monsanto SA, sê mielie-opbrengste lyk in hierdie vroeë stadium taamlik goed en in sommige gevalle selfs beter as wat verwag is. “Ongelukkig plaas dit meer druk op die kommoditeitspryse en bemoeilik dit graanboere se besluit oor aanplantings in 2018-’19.”
Mnr. Luan van der Walt, eko- noom van Graan SA, sê volgens terugvoer wat hy ontvang het, is daar boere in die sentrale gebiede wat nog wag dat hul mielies droog genoeg word om te stroop.
“Dit is veral in die oostelike dele waar die stropery goed op dreef is en plek-plek in die weste. Daar is selfs nog boere wat sonneblomme stroop.”
REUSEVOORRAAD
Mnr. Wandile Sihlobo, ekonoom van die sakekamer Agbiz, sê wat wêreldvoorraad betref, verwag
die Internasionale Graanraad ’n afname van 4% in Amerika se oes in 2018-’19. Ook in Europa word ’n afname van 2% verwag, maar groter oeste in onder meer Brasilië, Argentinië, die Oekraïne, China en Rusland sal daarvoor vergoed. Die verwagte wêreldproduksie in 2018-’19 word 1% hoër op 1,05 miljard ton geraam.
“Dit sal weinig invloed hê op Suid-Afrika se pryse vanweë die land se groot plaaslike voorraad wat op 16,4 miljoen ton geraam
word teenoor ’n jaarlikse verbruik van 10,7 miljoen ton.”
Smit sê wat die nuwe produksiejaar in Suid-Afrika betref, is risikobestuur en winsgewendheid sekerlik die belangrikste bepalers in die besluitneming van die boer.
“Goeie beplanning vir maksimum winsgewende produksie gaan belangrik wees. Produsente sal moet kyk hoe hulle met onder meer tegnologie, teelmateriaal en presisielandbou hul opbrengste tot ’n maksimum vlak kan verhoog en terselfdertyd hul insetkoste onder beheer hou.”
BEPLAN SÓ
Smit sê boere wat nou reeds vir 2018-’19 beplan, moet seker maak dat hulle ook saad bestel vir hul toevlugsgebiede. “Hulle moet seker maak dat hulle genoeg saad bestel vir ’n toevlugsgebied van 5% waar hulle glad nie teen insekte bespuit nie, of een van 20% waar hulle wel kan bespuit.”
Boere moet verder seker maak dat die basters wat hulle vir die toevlugsgebiede bestel, dieselfde groeityd het as die Bt-aanplantings. Wanneer ’n stapelgeenbaster geplant word, kan ’n Roundup Ready-mieliebaster gebruik word vir die toevlugsgebiede. Dit sal verseker dat die boer steeds sy mielies met Roundup kan bespuit.
Wanneer ’n Bt-mieliebaster geplant word, moet ’n konvensionele baster as toevlugsgebied geplant word, volgens Smit.
–