SKAPIES VAN WOL KOOP KOS VIR KUDDES
’N VINDINGRYKE handwerkprojek van ’n groep Sutherlandse boervroue het sedert November reeds R100 000 ingesamel vir droogtehulp aan die distrik se 141 boere.
Volgens me. Hester Obermeyer, skakelbeampte van die Sutherland-droogtekomitee, is dit vanjaar die vyfde opeenvolgende winter dat dié boere “elke liewe dier op hul plase sal moet voer”.
Die Save the Sheep-projek het ontstaan uit ’n idee van me. Sybil Visagie, ’n boervrou van die distrik, om skapies van egte wol te brei wat as aandenkings of speelgoed verkoop kon word.
Die eerste skapie is aan me. Elizabeth Visagie, voerkoördineerder van Gift of the Givers, gewys. Dié hulporganisasie het onderneem om wol aan die boervroue te verskaf waarvan hulle die skape kon brei, en sedertdien het die projek van krag tot krag gegaan. “Tot dusver het ons al sowat 200 skape gebrei,” sê Visagie.
UITGEBREI
Met ’n tweede vrag wol wat hul- le van Gift of the Givers ontvang het, het die boervroue ook van die plaaswerkers se vroue begin oplei om onder meer matte en serpe te hekel en brei.
“Nie almal kan brei of hekel nie. Daarom het ons ook begin beskuit bak,” sê Visagie.
Dié beskuit word veral deur me. Alta de Lange van die Verlatenkloof-padstal naby Sutherland bemark.
Obermeyer meen die gevolge van die heersende droogte kan selfs die Groot Depressie van die vroeë 1930’s oortref.
“Kontantreserwes is lankal uitgeput, oortrokke rekenings by die bank is lank reeds oor die maksimum toelaatbare perk en 40% van Sutherland se permanente boere se koöperasierekeninge is gesluit.”
Sy sê die meeste boere moes weens die droogte reeds hul skaapkuddes met meer as die helfte verklein, met sommige wat in die proses permanent goeie teelmateriaal moes inboet.
“Werksgeleenthede gaan verlore, want die boere se kontantvloei is tot niet en hul kan nie meer die werkers se lone bekostig nie. Die gesinne wat afgelê word, trek dorp toe. Armoede en misdaad vererger en die las op die staat word al hoe swaarder en dringender,” sê Obermeyer.
SO LANK AS NODIG
Die gemeenskap beoog om met die projek voort te gaan solank as wat dit nodig is. “Dit het ’n baie gunstige uitwerking op al die vroue wat betrokke is.”