Nuwe glans vir Radium se staatmakers
Duisende boere en belangstellendes het Radium Engineering se aanbod van grondbewerking s toerusting, strooiers, snyers en ander werktuie op die Nampo-Oesdag van nader bekyk.
Radium Engineering se nuwe handelsmerkontwerp, wat verlede jaar bekend gestel is, het vanjaar die eerste keer op Nampo op sy werktuie en toerusting verskyn.
Radium is een van die oudste uitstallers op Nampo-park. Hy streef sedert 1965 daarna om die beste verskaffer van landbouwerktuie en toerusting in Suider-Afrika te wees.
STROOIERS
Die BulkSpread-reeks kan van 8 m3 tot 10 m3 materiaal laai en versprei. Die hoëgehalte-, geverfde sagtestaalbak bestaan uit velen plaatmetaal wat aanmekaar gesweis is. Die onderstel is van hoëgraadse buisstaal om krag en soepelheid te bied wanneer die strooier werk.
Die veiligheidsketting op die sleepstang is ’n voorsorgmaatreël ingeval die haak, haakboute of trekkertrekstang tydens werk breek. ’n Stewige parkeerdomkrag verseker ook maklike koppeling en loslating van die masjien voor en nadat dit gewerk het.
Die S-vormige trekstang laat ’n skerper draaisirkel toe. Dit verseker meer vaartbelynde beweegbaarheid.
Die bak van Radium se CompacSpread RSP 050-2.5Gstrooier van 3 ton hou 2,5 m3. Die strooier kan met ’n 45 kWtrekker gesleep word. ’n Boord- of wingerdverspreidingstel word spesifiek gebruik om materiaal onder bome en tussen wingerde te versprei sonder om bemestingstowwe reg agter die strooier te plaas.
Die bak van die hidrouliese ProSpread-strooier van 10 ton het ’n houvermoë van 8 m3. Die strooier het ’n hidrouliese ratkas (22:1-verhouding) en verg ’n trekker van 123 kW. Die ProSpread bied aan mediumgroot en kommersiële boere, asook kontrakteurs die ideale opsie vir die verspreiding van klein hoeveelhede kunsmis tot groot hoeveelhede kalk en gips, asook medium- tot groot hoeveelhede droë organiese materiaal.
Hoëflottasiebande verbeter die vastrapaksie van die werktuig en verminder grondverdigting. ’n Isobus-dubbelkanaal of -enkelkanaalstel is beskikbaar in verskeie modelle.
GRONDBEWERKING
Die PowerRip-beitelploeg is ’n praktiese en veelsydige oplossing vir die meeste primêre grondbewerkingstake. Dit is ’n basiese, driepuntgemonteerde werktuig. Die unieke ontwerp en tanduitskopmontering voorkom dat dit in strawwe toestande breek. Sewe standaard-ploegtandkeuses kan 5 tot 17 tande bevat sodat die ploeg by die beskikbare trekkrag van die meeste trekkers pas.
Wat die PowerRip uniek maak, is die tanduitleg wat maklike materiaalvloei tydens grondbewerking moontlik maak.
Dit verminder die aanpak van materiaal in die tanduitleg en verminder slytasie op die onderdele.
Nampo-besoekers kon ook Radium se reeks tweetandskeurploeë van nader bekyk. ’n Stewige raam van vierkantige en reghoekige hoëgraadse staalpyp, wat met staalplate versterk is, verseker dat wringkrag en spanning eweredig oor die raam versprei word. Die reeks bied ’n keuse van ploeë met een tot agt tande met verskillende spasiërings vir spesifieke doeleindes.
Dié skeurploegreeks se eienskappe sluit in:
■ Danksy veranderbare ry-spasiëring, volgens die planter of die rywydtes van die gewasse, kan die masjien en planter in dieselfde sone werk.
■ Verharde busse op die tandklamp voorkom verlenging waar die skaarboute en draaiboute aangeheg is. Dit verseker dat die skeurhoek stabiel en akkuraat bly.
■ Daar is universele driepunt-haakplekke met verstellings om die bopen aan te pas om tussen standaard- en vinnige koppelings te kan skakel. Die hoëspoed-inlynskotteleg was ook ’n trekpleister op Nampo. Vinniger en doeltreffender vervoer tussen plase en landerye is moontlik danksy die nuwe, kompakte ontwerp van Radium se hoëspoed-inlynskotteleg.
Dié praktiese, veelsydige werktuig kan vir meer toepassings as net gewone egwerk gebruik word. Dieper, stadiger en deeglike prosesse word maklik deur die gebalanseerde gewig van die werktuig bewerkstellig.
Die werktuig kan ook vinniger en ligter werk doen indien nodig. Die werkspoed kan wissel van 8 km/h tot 16 km/h, na gelang van die werksdiepte (wat van 50-150 mm kan wissel). Die vertikale en horisontale as- en skottelposisies verbeter die grondindringing en -tekstuur.