Nuwe ysters skitter by New Holland-uitstalling
New Holland Landbou se Nampouitstalruimte van 3 500 m2 was propvol nuwe aanbiedinge en opwindende tegnologie vir hedendaagse boere.
New Holland Landbou se Nampo-uitstalling vanjaar was die eerste sedert die bestuursoorname deur die CNH Industrial-groep om toerusting regstreeks in Suid-Afrika te versprei.
“New Holland is hier om te bly,” het mnr. Federico Bellotto, bedryfsdirekteur vir die MiddeOoste en Afrika, gesê.
“Ons beleggings in Suid-Afrika het in die jongste tyd daarop klem gelê om ons onderdele-pakhuis te vestig en om trekkers plaaslik te monteer uit voorafvervaardigde seksies. New Holland se waardeproposisie lê nie net in sy produkaanbod nie, maar in sy mense se kennis en dienslewering, ondersteuning en die verbetering van plaaslike strukture en verkoopspanne.”
NUWE TREKKERS
Die boordtrekkers het veral aandag getrek. Die nuwe T4LP-reeks (Low Profile) bied ’n oplossing aan wingerd- en sitrusboere wat teen steil hange moet werk.
Die tweede generasie TDFwingerd-en-boord-trekkerreeks is die eerste keer uitgestal. Die nuwe weergawe het ’n herontwerpte platform en kontrole-uitleg, die opsie van ’n spoelkas en nuwe stilering. As jy meer krag soek, het die TD90F ’n 3,9 literFPT-S8000-enjin (65 kW).
Nie net is die voorkoms van die TD65F vernuwe nie, maar dit is beskikbaar in tweewiel- en vierwielaandrywing. Die TDFreeks bestaan uit vier modelle wat toegerus is met die New Holland S8000-driesilinderenjin.
Nog ’n nuweling wat uitgestal is, was die TS6.120-hooglooptrekker. Dié model word gekenmerk deur sy besonder hoë grondvryhoogte en ’n aangeslane kraglewering van 88 kW.
Die Europese reekse T6000en T7000-trekker is ook vertoon, asook die T8-reeks wat wiele en rusperbande kombineer.
SLIM STROPERS
New Holland betree die klas 6-stropersegment met ’n nuwe, kleiner CR6.80-dubbelrotorstroper wat op Nampo te sien was.
Twee ander modelle uit die CR-reeks is ook uitgestal, naamlik die 7.90 en 9.80 met dubbele aandryfwiele of rusperbande.
Die reeks CR-dubbelrotor-
stropers is wêreldleiers op die gebied van krag, graangehalte, produktiwiteit en lae brandstofverbruik. Die toevoeging van die kleiner CR6.80-stroper bied ’n meer bekostigbare opsie vir
gemengde boerderye en kleiner saaiplase.
Besoekers kon ook die unieke Varifeed- en Flex-stropertafels besigtig en meer uitvind oor die tegnologie agter dié opsies.
SPUITE
Die selfaangedrewe spuite in die Guardian-reeks het ’n ongeëwenaarde grondvryhoogte, veelsydigheid en ’n unieke suspensie wat enige terrein kan baasraak. Met verskeie opsies, waaronder tenkgrootte, balkwydte en seksiebeheer, kan die hoëgehaltespuit pasgemaak vir enige taak bestel word.
Vir maksimum produktiwiteit kan die masjiene ook met die opsie bestel word om gewasse plat te sny. Só verander dit in ’n uiters veelsydige werktuig.
Intellispray is ook op dié spuite beskikbaar – dit spuit met impulse en neem draaie in ag vir doeltreffende toediening.
HOOIMAAK
New Holland se reeks hooimaaktoerusting op Nampo het ou en nuwe modelle ingesluit.
Die nuwe RB150-baler is ’n rondebaler met ’n veranderlike kamer wat bale van 0,9 m tot 1,5 m maak en met net bind.
Die RB125-baler is ’n vastekamer-rollerbaler wat bale van 1,25 m maak en met net bind.
Die BR6090-rondebaler en die gewilde BC5070-stampbaler, driepunt- en sleeptipe skyfsnyers was ook deel van die uitstalling.
Twee sleeptipe snyers wat uitgestal is, naamlik die 313 en 316, is toegerus met die Mowmax 2-snybalk, wat bestaan uit groter skywe vir verhoogde kapasiteit en ’n skoon, lae snit.
PRESISIEBOERDERY
Met die oog op presisieboerdery skakel New Holland se PLM-toerusting (presision land
management) en rekenaarsagteware goed in by jou boerdery. Dit sluit in ’n volledige reeks GPS-stuurstelsels en sagteware vir die ontleding van opbrengsdata om koste beter te bestuur.
New Holland se PLM-spesialiste rugsteun nie net fabrieksgemonteerde stelsels nie, maar kan ook bykomende toerusting voorsien en installeer.
NAVRAE: Mnr. Ockert Scheepers, produkbestuurder by New Holland SA, sel 082 380 2405.