MEDALJES VIR JONG STERRE

Die toekenning van die gesogte Landbouweekblad-medalje aan die beste leerders in landbouvakke by landbou-opleidingsinstellings het verlede jaar nuwe lewe gekry danksy ’n finansiële bydrae deur Agri SA. Vanjaar het die Universiteit van die Vrystaat ook besluit om die toekenningsgeleentheid te ondersteun.

Altesame 16 skole het verlede jaar aansoek om die medalje gedoen. Met dié medalje wil Landbouweekblad erkenning gee aan talentvolle, hardwerkende leerders en hulle aanmoedig om ’n loopbaan in die landbou te volg.

Leerders van landbouskole en skole met landbouvakke, soos die Landbougimnasium Augsburg (Clanwilliam, WesKaap), Hoërskool Middelburg (Mpumalanga), Landboukollege Grootfontein (Middelburg, Oos-Kaap), Landbou-akademie Morgenzon (Mpumalanga), Hoër Landbouskool Winterberg (Fort Beaufort, OosKaap), Hoër Landbouskool Marlow (Cradock, Oos-Kaap), Hoër Landbouskool Weston (Mooirivier, KwaZulu- Natal) en Hoër Landbouskool Oakdale (Riversdal, Wes-Kaap) het verlede jaar medaljes ontvang.

Vanjaar word die medaljes op 6 Oktober op ’n spesiale geleentheid by die Universiteit van die Vrystaat deur Chris Burgess, Landbouweekblad se redakteur, oorhandig.