RUOLIE KAN NOG KUNSMISPRYSNEIGING LAAT OMSWAAI

Kunsmispryse behoort in die afsienbare toekoms meestal sywaarts te beweeg, sê mnr. Corné Louw, senior ekonoom van Graan Suid-Afrika. “Die enigste faktor wat wel dié neiging kan verander, is die ruolieprys wat weer besig is om te styg. Dit kan moontlik in die toekoms ’n impak hê. Stikstof word uit natuurlike gas vervaardig, wat in die Noordelike Halfrond met ruolie meeding. Die prys van natuurlike gas en ruolie loop hand aan hand. Daarom kan ’n styging in die prys van hierdie kommoditeit later kunsmispryse begin beïnvloed.”

Op internasionale vlak en in dollarwaarde het die prys van ammoniak op ’n jaargrondslag met 28% gedaal, terwyl die prys van ureum met 14% gestyg het. Fosfaat- en KCl-pryse het ook met onderskeidelik 11,4% en 16,1% toegeneem. “Die styging in ureumpryse is die gevolg daarvan dat ureum meer as ammoniak in kunsmis gebruik word. Die verwagting is egter dat die ureumprys dié van ammoniak later van tyd sal volg en weer daal,” het Louw gesê.

’n Sterker wisselkoers op ’n jaargrondslag het ook gunstiger kunsmispryse vir plaaslike boere bewerkstellig. Suid-Afrika voer meer as 80% van sy kunsmis in, en ’n sterker rand is dus meer voordelig vir kunsmisinvoer.

“Wanneer ons boonop die internasionale prys daarna in rand omgesit het, lyk die prentjie nog rooskleuriger, met die ammoniakprys wat met 35% gedaal het, die ureumprys wat met 2,5% gestyg het en DAP se prys wat slegs 0,1% toegeneem het. Plaaslik, waar ons KAN met ammoniak vergelyk het, het KAN met 8,2% gestyg, terwyl die ureumprys met slegs 1% gestyg het en dié van KCl met 2,6%,” volgens Louw.