PROBLEME OP DIE VLAKTE

Langer as ’n dekade al sukkel die boere van die Kaapse Vlakte met diefstal van veral gewasse en infrastruktuur. Mnr. Alan Winde, Wes-Kaapse minister van ekonomiese geleenthede, het in ’n onlangse inisiatief om dié boere by te staan om voedselsekerheid en werkgeleenthede in die stad te verseker, misdaad as die grootste bedreiging vir hul volhoubaarheid bestempel.

Vir mnr. Ian Grummbacher is dit ’n bekommernis, maar nie ’n oorlog nie. “Ons is betrokke by die pogings om misdaad hok te slaan. Ons werk nou saam met die owerhede en polisie en ons reik uit na die omliggende gemeenskappe, maar dit is nie iets waaroor ons heeldag bekommerd kan wees nie. Ons is hier om te boer, en dit bly waarop ons konsentreer.”

Daar is egter ’n ander bedreiging vir die boere van Philippi, en dit is geld. Die grond waarop hulle boer, is al gewaardeer vir R400 000/ha en daar is gerugte dat sommige boere al tot R1 miljoen per hektaar aangebied is. Hierdie astronomiese aanbiedings kom van ontwikkelaars wat die geleentheid sien om die boerderygrond van Philippi in nywerheids- en woongebiede te omskep.

Tans is daar ’n hofgeding tussen ’n ontwikkelaar en sekere grondeienaars van Philippi oor ’n stuk grond wat tans nog as landbougrond gesoneer is, maar waarvoor ’n h ers o nering aansoek ingedien is.

Die bekommernis van boere, soos Ian, is dat die oorblywende boere bloot van hul grond af geboelie gaan word indien daar te veel ontwikkeling in die gebied begin plaasvind.

“Ons is almal derde-en vierde geslag boere, sommige selfs langer ,” sê Ian.

“Wat gaan ons doen as ons die grond verkoop het?”