Vra vir Faffa
Wat behels die Suid-Afrikaanse wette oor hormoonbehandeling by diere, spesifiek beeste en Boerbokke? Kan ’n mens Ralgro vir skape ook by bokke gebruik? Wat sal die uitwerking op kapaters en ooitjies wees?
Daar bestaan geen “wette” oor hormoonbehandeling nie. Die begrip “groeibevorderaars” word gebruik vir die implantate wat by skape en beeste gebruik word om presies dit te doen wat die naam sê. Die doel van groeibevorderaars is om die produksiekoste van ’n skaap- of beesboerdery te verlaag deurdat swaarder lammers of kalwers gespeen word en diere winsgewender afgerond en slaggereed gemaak word.
Twee soorte implantate word gebruik, naamlik dié wat Zeranol bevat en die soorte wat verskillende konsentrasies van manlike en vroulike hormone en/ of hormoonnabootsers bevat.
Die implantate wat Zeranol bevat, word Ralgro (reg.nr. G1082, Wet 36 van 1947) genoem en is geklassifiseer as ’n plantaardige stof afkomstig van ’n gistingsproses. Dit is ’n nie-hormonale stimulant. Die hormonale implantate is vir die voerkraalbedryf bedoel om daar groei te bevorder.
Ralgro vir skape word aanbeveel vir gebruik by skape. Hoewel dit by bokke behoort te werk, is dit nie vir gebruik by bokke geregistreer nie. Die middel kan dus slegs op aanbeveling van jou eie veearts voorgeskryf word.
Ralgro het min of meer dieselfde voordelige uit- werking by manlike én vroulike diere — dus kapaters én ooitjies.
Ralgro vir skape bevat 12 mg Zeranol en kan van ses weke af ingeplant word. Dit kan weer ná 30 dae herhaal word by lammers wat bestem is vir die voerkraal of uiteindelik geslag gaan word. Dit word nie vir teeldiere aanbeveel nie.
Zeranol stimuleer die hipofise wat groeihormoonafskeiding verhoog. Dit het tot gevolg dat beengroei (raamwerk) en spiergroei verbeter en vetneerlegging verlaag. Dit stimuleer ook insulienafskeiding deur die pankreas, verbeter eetlus en dwing meer suiker in die spiere in. Dit verhoog ook die insulien-groeihormoon wat spierweefselkerne vermeerder.
Zeranol het verder ’n kalmerende uitwerking op die diere met gevolglike makliker aanpassing, minder stres en verbeterde immuniteit deurdat die kortisolvlakke verlaag word.
Met ’n beter voeromsetting, verhoogde uitslagpersentasie en verhoogde daaglikse gewigstoename lewer die implantaat dus ’n goeie opbrengs op die belegging. Dit is egter belangrik dat bestuur en voeding ook op standaard moet wees om die volle voordeel van die belegging in implantate te verkry.