Markte
Die gemiddeld sowat 19 miljoen braaihoenders per week wat in Januarie vanjaar in Suid-Afrika geproduseer is, was 11% meer as ’n jaar gelede.
Luidens die SA Pluimveevereniging (SAPV) se jongste produksieverslag was die gemiddelde produsenteprys van braaihoender in Januarie 9,8% hoër as in die ooreenstemmende maand verlede jaar.
Verlede jaar was die produsenteprys van braaihoender gemiddeld R21,44/kg, wat R2,79 (15%) hoër was as in 2016. Die produsenteprys van gemengde, kitsbevrore stukke was in Januarie gemiddeld R23,55/ kg, wat 13,2% hoër was as in Januarie verlede jaar.
Die SAPV sê die groot prysstyging moet gesien word teen die agtergrond van ’n bitter klein styging vir dié snitte in 2016.
Die invoer van bevrore stukke aan die been uit Europa wat met plaaslike kitsbevrore stukke meeding en sonder invoertariewe die land binnekom, het verlede jaar drasties gedaal vanweë voëlgriep in Europa. Brasilië, wie se produkte onderhewig is aan invoertariewe, het die geleentheid aangegryp en was verlede jaar die belangrikste bron van ingevoerde hoender.
In Maart vanjaar, soos die hele verlede jaar, het sowat 60% van ingevoerde hoender uit Brasilië gekom en die naasmeeste (24%) uit Amerika. In Maart vanjaar is 30,7% meer braaihoenderprodukte as in Maart verlede jaar ingevoer.
Van Januarie tot Maart was die geakkumuleerde hoeveelheid bevrore stukke aan die been wat ingevoer is, egter 17,9% laer as in die eerste drie maande van verlede jaar.