AUGSBURG SE LEERDERS GEE TAMFIAT’N NUWE ASEM
’N MATRIEKSEUN van die Landbougimnasium Augsburg op Clanwilliam het sy skool bykans R16 000 bespaar deur self die skool se ou Fiat 480-boordtrekker te restoureer – net betyds vir oestyd. “Hy blink nou weer soos ’n nuwe trekkertjie,” vertel Willem Boonzaaier, voorsitter van die junior landbouvereniging en koshuishoofseun van Huis Awie.
Hy het verlede jaar besluit om dié langtermynprojek aan te pak, veral aangesien dit mooi by hul landboutegnologie-leerplan inpas. Klasmaats het hand bygesit en Willem het onder die toesig en leiding van sy pa, Jan, en onderwyser, mnr. Philip Ferreira, met herstelwerk weggespring.
Veral die ratkas het probleme gegee, sê Willem. “Die tweede rat nie wou ingaan nie en die derde rat het uitgespring.”
Cederberg Trekkers en Implemente op Citrusdal het onderneem om die ratkas gratis te herstel. “Ek en Hendre Smith het intussen die panele reggemaak en gespuit. Toe die ratkas terugkom, het ek en Gustav Kruger dit ingesit. Daarna het ek die ratkas en enjin oorgespuit en die panele teruggesit.
“Die trekker is toe gediens. Die enjin- en ratkasolie is afgetap en vervang, asook alle filters.”
Om die bedrading oor te doen, was die moeilikste deel.
“Ná al die gesweet wou die trekker nie aanskakel nie. Ek het onmiddellik begin twyfel in my outo-elektriese werk, maar toe besef die aansitter is foutief. Ná ’n groot gesukkel het ek ’n tweedehandse een opgesit.”
Mouton Citrus en Augsburgplaas het geld geskenk om verf, ratkasonderdele, olie, filters, kopligte en ’n aansitter te koop. Om die trekker by ’n gesertifiseerde werkswinkel te laat restoureer, sou byna R26 000 gekos het.
Willem en sy mede-leerders se laat nagte het die skool uiteindelik sowat R16 000 bespaar.
Boonop kon die landboutegnologie-klas praktiese ondervinding opdoen. “Almal het iets geleer,” sê Willem.