CHINA SAL BEPAAL OF GOEIE WOLPRYSE HOU
DIE Suid-Afrikaanse wolmark het vanjaar op ’n algehele rekordvlak van R211,99/kg vir skoonwol gesluit. Dit is 39% hoër as waar die mark verlede jaar gesluit het en 12,9% hoër as aan die begin van die seisoen.
Mnr. Guillau du Toit, voorsitter van die Nasionale Wolkwekersvereniging (NWKV), sê die wolbedryf beleef ’n supersiklus wat reeds die afgelope 26 maande duur. Die vorige supersiklus in die 1980’s was van korte duur, maar daar word verwag dat die huidige siklus sal voortgaan.
Die totale Suid-Afrikaanse wolskeersel was nagenoeg 49 miljoen kg. Dit is ’n afname van 3 miljoen kg teenoor die vorige seisoen, hoofsaaklik weens die droogte. Caledon is die distrik wat die meeste wol gelewer het.
Die grootste koper vanjaar was China. Die Tsjeggiese Republiek was die grootste aankoper uit Europa. Wol is in hierdie lande gewild vanweë die nuwe modeneigings en die vraag na natuurlike vesels.
“Die boere het ondanks die droogte steeds ’n briljante vertoning met hul skeersel gelewer, dit was die mens teen die natuur. Ek glo egter die goeie pryse was ’n uitkoms vir baie boere,” het Du Toit in sy voorsittersverslag op die NKWV se jaarlikse kongres in Port Elizabeth gesê.
Du Toit sê boere moet in pas bly met die huidige neigings in die wolmark en hul praktyke daarvolgens aanpas.
Mnr. Derick Pape van die wolkoper Modiano sê die mark vra langer wol, en daar is steeds te veel kort wol uit die Suid-Afrika. Daar is ook ’n groot vraag na mediumwol in die spektrum van 20,5 mikron tot 22 mikron.
Mnr. Isak Staats, bestuurder van wol en bokhaar by BKB, sê die pryse was op die laaste paar veilings hoog omdat verwerkers moes spring om wol te koop sodat hulle nie in die komende agt weke sonder wol sit nie.
Mnr. Louis de Beer, bestuurder by Cape Wools, sê die wolmark word tans hoofsaaklik aangedryf deur die vraag na lang fynwol van goeie gehalte. Dit blyk onder meer daaruit dat die rekordprys vir fynwol in die afgelope seisoen vier keer verbeter is.
Op die laaste veiling is ’n rekordprys van R230/kg betaal vir drie bale BH-wol van 16,8 mikron met ’n skoonopbrengs van 78,45 % van mnr. Christiaan Wagenaar van die plaas Bloemhof in die distrik Jamestown.
GROOT AFWAGTING
Verskeie belanghebbendes in die bedryf benadruk dat boere die nodige tyd in die skeerskuur moet deurbring om goeie klasseringstandaarde te handhaaf en besoedeling te vermy. Hulle moet ook hul skape gesond hou vir goeie, gesonde wol met ’n goeie treksterkte en lengte, en by die kode vir beste praktyke vir wolproduksie hou.
Staats verwag dat die mark
dieselfde vlakke in die volgende seisoen sal handhaaf, maar dat daar nie noodwendig weer sulke stygings ervaar sal word nie.
“Die bedryf is in groot afwagting oor die wintermodes in China. Ons hoop en vertrou dat die klem op natuurlike vesels sal bly,” sê mnr. Heinrich Victor, bestuurder van natuurlike vesel by CMW/OVK. Hy sê die wisselkoers kan ook ’n bepalende faktor wees.
SLENKDALKOORS
Boere word aangeraai om gedurende die wintertyd die nodige voorkomende stappe teen slenkdalkoors te doen nadat ’n geïsoleerde geval onlangs naby Jacobsdal aangemeld is.
“Dit is nie ’n kwessie wat ligtelik opgeneem moet word nie. Gaan versprei die boodskap dat boere tydens die winter voorsorg moet tref voordat die somerreëntyd weer begin. Bestel die entstof betyds omdat Onderstepoort Biologiese Produkte net entstof gaan vervaardig as daar ’n vraag is,” sê Victor.