Produksiegroei noop groot belegging by Eden Agri
’N CHINESE maatskappy wie se sorteertoerusting in meer as 700 sitruspakhuise in sy tuisland en meer as 200 elders ter wêreld diens doen, se vierlyn- optiese sorteermasjien is onlangs in die Eden Agri-pakhuis naby Fort Beaufort in die Oos-Kaap in bedryf gestel.
Die toerusting van die Chinese vervaardiger Reemoon was te sien op ’n ope dag aan die sitrusbedryf vroeër vandeesmaand by die pakhuis.
Nege van die 12 sitrusplase wat aan Eden Agri lewer, word deur opkomende boere bedryf. Sedert mnr. Shaun Brown, ’n voormalige landbouvoorligter by Capespan, die pakhuis in 2010 gestig het, het die besigheid se jaarlikse produksie gestyg van net meer as 100 000 kartonhouers tot ’n geskatte 375 000 kartonhouers vanjaar. Dit is dié reusestyging wat die besigheid laat besluit het om sy tweedehandse tweelyn- elektroniese sorteermasjien te vervang met die Remoon-sorteermasjien wat vir R8 miljoen spesifiek vir Eden Agri gebou is.
Die masjien kan van 20 tot 24 ton lemoene per uur sorteer teen ’n 70%-bekervul.
“Dit gaan tot dusver baie goed. Ons is baie tevrede met die professionaliteit waarmee Reemoon die projek benader het, en ons is baie tevrede dat die maatskappy ons vennoot is,” sê Brown.
Die maatskappy Jiangxi Reemoon Technology Holdings is in 2001 gestig en spesialiseer in na-oestoerusting vir vrugte en groente. Reemoon se Suid-Afrikaanse filiaal is einde 2016 gestig met die oog op die Suid-Afrikaanse en Swazilandmarkte. Daar is reeds 24 Reemoon-masjiene in gebruik in die streek.
GOEDKOPER
Mnr. Gerard Meyer, verkoopsbestuurder by Reemoon SA, sê die maatskappy se toerusting is tot 45% goedkoper as alternatiewe wat in Suid-Afrika beskikbaar is.
Ofskoon Reemoon se hoofkantoor in China is, word onderdele wêreldwyd ingekoop, van onder meer Italië, Japan en Duitsland, om die beste gehalte te verseker.
Die Duitse kamerategnologie wat Reemoon gebruik, kan 121 foto’s per sekonde neem. Dit werk saam met ’n sagtewarestelsel wat vrugte volgens gewig, deursnee, vorm en eksterne vlekke kan sorteer, en selfs volgens interne faktore, soos suiker- en suurgehalte.
Mnr. Pierneef Smit, adjunk-hoofbestuurder by Reemoon SA, sê die maatskappy se doelstelling is om uitstekende en betroubare naverkoopdiens te lewer, met die klem op voorkomende onderhoud van die toerusting en sagteware.
“Dit sal byvoorbeeld roetine wees om elke twee weke na jou pakhuis toe te kom, en elke week tydens die spitstyd,” sê hy.