LEER BY VOORSTE KENNERS OOR BEWARINGSLANDBOU
Bewaringslandbou Wes-Kaap (BLWK) se jaarlikse Jack Human-bewaringslandbouweek vind vanjaar op 7 en 8 Augustus plaas.
Die konferensie en praktiese dag, wat met die samewerking van LandCare Wes-Kaap en die Wintergraantrust gehou word, bring sprekers uit Wes-Australië, die Vrystaat en die Wes-Kaap byeen.
Op die konferensie op 7 Augustus val die klem op boere se ervaring met verskillende aspekte van bewaringsboerdery. Mnr. Trevor Syme, ’n boer van Wes-Australië, praat oor die noodsaak van beheerde spoorverkeer, en mnr. Hume Schönfeld, ’n boer van Caledon, vertel van sy ervaring met beheerde spoorverkeer.
Mnr. Clint Della Bosca, voorsitter van die Wes-Australiese geenbewerkingsboerevereniging (WANTFA), sal praat oor sy ervaring met boerdery in ’n gebied met ’n lae reën.
Mnr. Izak Dreyer, ’n boer van Vrede in die Vrystaat, gaan oor dekgewasse en beweiding praat, en mnr. Andries van der Poll, ’n nuwe-era-graanboer
van Gouda, oor sy vordering in die graanbedryf.
Die dag word afgesluit met ’n praatjie oor onlangse navorsing deur dr. Craig Galloway, navorser oor volhoubare landbou by Trace & Save, oor grondgesondheid by weidings. Dr. Hendrik Smith van Graan SA en me. Lorren de Kock van Blue North gaan praat oor die koolstofspoor van koringverbouing in die Wes-Kaap.
PRAKTIESE DAG
Proewe wat tydens die praktiese dag op 8 Augustus op die proefplaas Tygerhoek besoek word, sluit in dekgewasse en opvolggewasse, die gebruik van vooropkomsonkruiddoders saam met ’n skyfplanter, ’n skyfplanterproef met verskillende saaidigthede en kunsmistoediening met planttyd, ’n luserninsaaiproef, ’n proef oor mikrobiese funksionele groepe en proewe oor ’n biologiese benadering tot gewasbeskerming en die opbou van grond.
Die dag word afgesluit met ’n gesprek met Syme en Della Bosca.
Die konferensie word vanjaar by Houwhoek Inn, naby Grabouw, gehou. Bywoning van die konferensie én praktiese dag kos R800 per persoon, en R600 vir studente. Mense wat net die praktiese dag wil bywoon, betaal R200 en studente R100. Kaartjies is op Quicket beskikbaar.