WAATLEMOEN VIR EEN VERKOOP MEER
Regoor die wêreld eet mense meer waatlemoen. Dié neiging is veral te danke aan gerieflike, kleiner waatlemoene wat een mens op sy of haar eie kan eet en fermer vrugte wat geskik is om opgesny te word voor dit op winkelrakke beland.
“Waatlemoenverbruik styg regoor die wêreld en word steeds oorheers deur vrugte wat pitte bevat. Verbruikers in veral drie lande — Australië, Israel en Amerika — verkies egter pitlose kultivars. Dieselfde geld die supermarkte in Wes-Europa,” het mnr. Moti Shmueli van Origene Seeds tydens Agritech in Tel Aviv, Israel, aan Landbouweekblad gesê.
Volgens hom is een van die grootste ontwikkelings in die waatlemoenbedryf piepklein waatlemoene, wat as “persoonlike waatlemoene” bemark word omdat iemand dit op sy of haar eie kan geniet. “’Persoonlike waatlemoene’, wat 1 kg tot 3 kg elk weeg, is beslis ’n groeiende neiging in die meeste lande in Noord- en Wes-Europa.” Goeie voorbeelde daarvan is Belinda en Sky Line, pitlose mini-waatlemoene met ferm, soet en dieprooi vleis. Origene Seeds is ’n Israeliese saadmaatskappy wat spesialiseer in navorsing oor en die ontwikkeling van rankgewasse, spesifiek waatlemoen en spanspek. Die maatskappy het ’n hele reeks bestaande uit minien midi-waatlemoene. Laasgenoemde weeg 6 kg tot 8 kg.
Mnr. Zvi Amit van Hazera sê die ou reël van “hoe groter, hoe beter” geld nie meer vir waatlemoene op die meeste markte nie.
“Dit is net onprakties en heelwat daarvan beland in die drom. ’n Mini-waatlemoen is duurder per kilogram, maar dit is heelwat goedkoper as jy dit uitwerk per kilogram wat geëet word. Ons het aanvanklik geen mark gehad vir die produk nie, maar dit begin bou. Vandag is dit baie suksesvol.” Hul mini-waatlemoene weeg 2 kg tot 3 kg. “Dit is ’n groot treffer, veral onder stedelike verbruikers, want dis maklik om te dra en pas maklik in die yskas. Die waatlemoene is pitloos, rond en sommer net oulik.”
Hazera is die grootste saadmaatskappy in Israel. Waatlemoensaad maak sowat 5% van sy omset uit.
’n Ander neiging wat Shmueli uitgelig het, is die groei in die mark vir vars gesnyde waatlemoene. Vir hierdie mark is Origene se PSF-kultivars (production standard fresh) veral geskik.
“Dit is die toekoms. Dit is superferm waatlemoene wat uitgevoer en deur supermarkte opgesny kan word. Danksy die lae vloeistof-inhoud kan dit tot ses weke hou, wat aan boere ’n voordeel gee.” — LUCILLE BOTHA