LNR SE DATA IN DIE PALM VAN JOU HAND
Die doel van die Landbounavorsingsraad (LNR) se nuwe digitale toepassing is om bruikbare boerdery-inligting, -oplossings en -riglyne vir en oor ’n verskeidenheid landboukommoditeite in boere se hande te plaas.
Die toepassing, ARC Hub, is op Graan SA se onlangse Nampo-Oesdag by Bothaville bekend gestel ná maande van deeglike toetse.
Toegang tot die LNR se omvattende databasis van wetenskaplike navorsing deur middel van die toepassing sal boere in staat stel om hul produksie te verhoog en boerderypraktyke te verbeter, sê dr. Shadrack Moephuli, uitvoerende hoof van die LNR.
“Die app is ’n suksesvolle integrasie van digitale en boerderystelsels, en dit kan kommunikasie in die landbousektor verbeter. Dít baan die weg vir boere om meer ingeligte besigheidsbesluite te neem en sodoende die land se voedselsekerheid én hul eie winste ’n hupstoot te gee.”
Die produksiehandleidings op die toepassing dek ’n wye verskeidenheid graan, vrugte en groente, asook lewende hawe, plantgesondheid (met spesifieke klem op indringerplante) en landbouverwerking. Dit sluit ook ’n vroeëwaarskuwingstelsel in.
Die LNR se navorsingsdata, soos wat dit in sy laboratoriums versamel is, is nou toeganklik deur die toepassing se gebruikersvriendelike stelsel en koppelvlak. Dit is van groot waarde vir boere, sê Moephuli.
“Dit is ook ’n uitstekende bron van kennis vir diegene wat buite die landbou staan, maar daarin belangstel en meer wil leer.”
Gebruikers kan die inligting wat hulle verlang, verfyn deur spesifieke gewasse en diere te kies wanneer dit by die opstel van hul profiel kom.
Die toepassing bied ook toegang tot die LNR se kundiges wat hul ondervinding en kennis aan gebruikers beskikbaar stel en inligting oor beskikbare opleidingskursusse en voorligtingsdienste wat die instelling aanbied.
ARC Hub is met die geldelike ondersteuning van die Departement van Wetenskap en Tegnologie op die been gebring en deur mLab Southern Africa ontwikkel.
Jy kan dit gratis in die Google Play Store en Apple App Store aflaai.