Winterpoeding uit ouma se kombuis
Warm, stroperige poedings is sinoniem met winterdae en lang, uitgerekte Sondagmiddagetes. Ons kosredakteur gee vandeesweek ’n paar resepte vir nostalgiese poedings uit haar ou masse resep versamelings.
Souserige sjokolade f u d g e poeding
Toe ek ’n kind was, was sjokoladesouspoeding ’n groot gunsteling. My ma (wat dit by haar ma leer maak het) het ’n blitsresep daarvoor gehad wat sy binne tellings in haar Magimix-voedselverwerker aanmekaar geslaan het. Ek kan onthou hoe ek my verwonder het aan die poeding waarvan die sous bo-op dryf wanneer dit oond toe gaan en dan, wonderbaarlik, sit die sous aan die onderkant as dit uit die oond kom. Ek het my ma se resep effens aangepas en ’n skeut roomlikeur wat met brandewyn vermeng is, by die sous gevoeg.
Beslag
100 g sagte botter
■ 125 ml ligbruinsuiker
■ 1 eier
■ 5 ml vanieljegeursel
■ 250 ml bruismeel
■ 15 ml kakao
■ 1 ml sout
■ 80 ml melk
■
Sous
125 ml sagte bruinsuiker
■ 15 ml kakao
■ 250 ml kookwater
■ 125 ml Amarula-likeur
■ 5 ml vanieljegeursel
■
Voorverhit die oond tot 180 °C en smeer 5-6 individuele oondvaste bakkies of een middelslagoondbak met botter of spuit met kleefwerende kossproei. Verroom die botter en suiker tot lig. Klits die eier en vanieljegeursel by en daarna die droë bestanddele en melk. Klits tot ’n gladde, dik beslag vorm. Verdeel die beslag tussen die bakkies (of skep dit in die oondbak). Meng al die bestanddele vir die sous saam en verdeel dit ook tussen die bakkies (giet dit versigtig boop die beslag) of giet die sous oor die beslag in die oondbak. Bak vir 30 minute of tot die koeklaag bo-op deurgaar is en die sous teen die kante van die poeding borrel. Sit voor met roomys, geklopte room of vla.
Rolpoeding (roly poly)
Die smaak van rolpoeding is vir my een van die mees nostalgiese smake wat daar is. Dit proe soos kleintyd en voer my onmiddellik terug na my oumas se kombuise. Hulle het dik, tuisgemaakte appelkooskonfyt met milde hand op die deeg gesmeer voordat dit opgerol is. Soms is daar ’n hand vol gekapte neute oor die konfyt gesprinkel, soms net ’n bietjie fyn kaneel. Ander kere was gerasperde appel en ’n paar goue sultanas deel van die vulsel. Die geheim van rolpoeding is dat jy dit moet eet met regte, egte tuisgemaakte plaasvla. Geen boksvla sal reg laat geskied aan hierdie treffer van toentertyd nie.
Deeg
500 ml koekmeel
■ 10 ml bakpoeier
■ 1 ml sout
■ 45 ml botter
■ 1 eier
■ 100 ml melk
■ 180 ml appelkooskonfyt
■ Hand vol gekapte pekanneute
■ OF 2 geskilde, gerasperde appels (opsioneel)
Stroop
500 ml suiker
■ 15 ml botter
■ 5 ml fyn kaneel
■ 850 ml kookwater
■