KATOENOES DRASTIES GROTER
Die verwagte plaaslike katoenoes is vandeesmaand (die vyfde skatting) met 1% teenoor verlede maand verhoog om die totale verwagte oes nou 143% hoër as die vorige seisoen te maak.
Volgens Katoen SA se maandelikse markverslag word daar nou 188 247 bale vesel van die Suid-Afrikaanse pluksel in 2017-’18 verwag. Droëland- en besproeiingshektare toon toenames van onderskeidelik 68% en 170% teenoor die vorige seisoen. Dit word hoofsaaklik toegeskryf aan die gunstiger pryse vir katoen teenoor mededingende gewasse. Daar is ook hernieude belangstelling in katoenproduksie. ’n Verdere 1 080 bale sal na verwagting in Swaziland gelewer word.
Wat termynpryse vir katoen betref, het dit einde Mei tot ’n nuwe hoogtepunt in vier jaar in New York gestyg.
Die Cotlook A-indeks (’n aanwyser van internasionale katoenpryse) het begin Junie op 100,7 VSA c/ lb gestaan teenoor ’n jaar gelede se86,95VSAc/lb.
Die Internasionale Katoenadvieskomitee (ICAC) skryf die hoër prys toe aan kommer oor uiterste klimaat en ’n sprong in katoenvesel- en garepryse in China waar swak weer ook die volgende oes kan benadeel.
Die ICAC raam dat die wêreldproduksie 26,6 miljoen ton in 2017’18 sal bereik, terwyl die verbruik op 25,5 miljoen ton geprojekteer word. Die verbruik sal na verwagting in 2018-’19 met ’n verdere 5% tot 26,7 miljoen ton toeneem.