GROEP VEG VOORT TEEN MYNPLANNE BY WAKKERSTROOM
’N KOALISIE van agt gemeenskapsorganisasies het aansoek gedoen by die Hooggeregshof in Mbombela dat die departement van omgewingsake in Mpumalanga se goedkeuring van ’n steenkoolmyn by Wakkerstroom hersien en ter syde gestel word.
Dit volg op ’n lang regsproses wat die koalisie voer om die mynmaatskappy AthaAfrica Ventures te verhinder om ’n ondergrondse steenkoolmyn in die gebied op te rig.
In ’n verklaring waarsku die sentrum vir omgewingregte (CER) dat die beoogde Yzerfonteinmyn in ’n beskermde gebied lê wat as ’n strategiese waterbron vir die omgewing geïdentifiseer is. Die CER is die regsverteenwoordiger vir die koalisie van organisasies wat Earthlife Africa, die Mynen Omgewingsreggemeenskapsnetwerk van SuidAfrika, die Trust vir Bedreigde Dierelewe, die Federasie vir ’n Volhoubare Omgewing, GroundWork, die vereniging vir water en landelike ontwikkeling (AWARD) en die Bench Marksstigting insluit.
APPÈL MISLUK
Die koalisie se aansoek kom nadat mnr. Vusi Shongwe, LUR vir omgewingsake in Mpumalanga, ’n appèl teen die oorspronklike goedkeuring van die hand gewys het.
Saam met die hersieningsaansoek bring die CER ook aansoek om ’n hofbevel wat enige mynbedrywighede verbied totdat uitsluitsel oor die hersiening gegee is.
Die beoogde myn kan volgens die koalisie ’n swaar impak op plaaslike gemeenskappe hê.
“Hul toegang tot water sal ingeperk word omdat grondwatervlakke sal daal en fonteine sal opdroog. Water sal ook besoedel word,” sê die CER.
Uitgebreide vee en gewasboerdery stroomaf kan ook skade ly. Verder meen die koalisie dat die steenkoolmyn selfs ’n nasionale impak op watersekerheid kan hê. Die beoogde myn val in die opvangsgebied van die Vaalrivier, wat Gauteng van water voorsien.
MINISTER STAAN VAS
Me. Edna Molewa, Minister van Omgewingsake, het egter verlede jaar in ’n rubriek in die koerant Business Day gesê haar departement is tevrede dat die provinsiale departement alle risiko’s in ag geneem het.
Sy sê hoewel mynbedrywighede nie in natuurreservate, nasionale parke en spesiale reservate toegelaat mag word nie, is dit wel toelaatbaar in beskermde gebiede, soos die gebied waar die Yzerfonteinmyn beoog word, mits geskrewe toestemming van die Minister van Omgewingsake en die Minister van Minerale Hulpbronne verkry word.
Molewa sê albei departemente het streng riglyne aan AthaAfrica gestel waarby die myn sal moet hou.
Die myn moet onder meer toestemming van die Departe ment van Water en Sanitasie kry voordat dit met enige bedrywighede begin wat ’n impak op waterbron kan hê, en hy moet stappe doen om die dreinering van suur mynwater te voorkom.
Die CER meen egter hy het genoeg bewyse dat die myn die omgewing tot nadeel sal strek. Hy is vol vertroue dat die koalisie daarin sal slaag om mynbedrywighede in die gebied te stuit.
ZUMA-VENNOOT?
Die webwerf Moneyweb berig dat AthaAfrica geen ander aktiewe mynbedrywighede in SuidAfrika het nie. Die maatskappy se bemagtigingsvennoot is die Bashubiletrust.
Moneyweb haal trustdokumente aan wat mnre. Vincent Gezinhliziyo Zuma, Prince Thabo Mpofu en Sizwe Christopher Zuma as trustees lys. Hoewel Moneyweb erken daar is geen gedokumenteerde bloedverwantskap tussen die twee Zumas en SuidAfrika se vorige president nie, verwys die webwerf na ’n berig van News24 waarin na Sizwe as oudpresident Zuma se seun verwys word.
Teen druktyd het AthaAfrica se kommunikasieagentskap nog nie op Landbou
weekblad se vrae oor die hofaansoek of die Zumafamilie se beweerde betrokkenheid gereageer nie.