Dié parasiete kan jou wins vreet

Inwendige en uitwendige parasiete kan bekamp word en verskeie entstowwe en middels is daarvoor beskikbaar. Tree betyds op en keer dat parasiete jou wins steel.

In die maandelikse verslag van die Herkouerveterinêre Vereniging van Suid-Afrika (RuVASA) blyk dit dat die goeie neerslag wat laat in die somerreëngebied geval het, ook gelei het tot hoë parasietbevolkings. “Ondersoek jou diere of laat jou kuddeveearts kyk vir tekens van besmetting deur inwendige parasiete wat produksie kan belemmer,” sê dr. Faffa Malan, bestuurder van RuVASA. “Hopelik sal koue weer en ryp hierdie winter die besmettingskoers van parasiete, soos haarwurm, help beperk.

“Gebruik byvoorbeeld die vyfpuntkontrolelys om ’n algemene ondersoek by kleinvee te doen. Soek vir tekens van parasietbesmetting deur na die oogslymvlies, neus en bek, keel, kondisietelling en onder die stert te kyk vir byvoorbeeld tekens van diarree. Gebruik die Famacha-kaart om die kleur van oogslymvliese te monitor. Bleek slymvliese dui op waarskynlike besmetting deur inwendige parasiete, soos haarwurm. Raadpleeg jou veearts as jy onraad vermoed.”

Hy meld ook dat kriptosporidiose saam met besmetting met

Escherichia coli steeds groot probleme vir bees-, skaap- en bokboere veroorsaak. “Veral jong diere is kwesbaar.”

Die voorkoms van inwendige parasiete is in Mei deur veeartse van oor die hele land aangemeld. Die TABEL wys watter parasiete in die verskillende provinsies voorgekom het.

BOSLUISE

Moenie voor die voet dip spuit of middels opgiet as bosluisprobleme volhard nie. Bepaal die lading van parasiete, soos bloubosluise, wat weerstandbiedend kan wees teen die middels wat jy gewoonlik gebruik. Trek ’n aantal volgesuigde bosluise af en stuur die monster vir ontleding om vas te stel of dit weerstandbiedende bloubosluise is.

Raadpleeg jou veearts oor watter aktiewe bestanddele an- dersins gebruik kan word.

Volgens Dok Faffa is Asiatiese rooiwater ’n bosluisoorgedraagde siekte wat skielik in die land begin versprei het. “Dit is een van die dodelikste siektes onder beeste en talle vrektes is al aangemeld.” Die winter is die beste tyd om teen Asiatiese rooiwater in te ent.

KUNDIGES

’n Volledige verslag oor siektes wat maandeliks deur veeartse aangeteken word, is op www.

ruvasa.co.za beskikbaar. Vir vrae aan Dok Faffa en sy span kundiges, meld aan by

www.landbou.com. Hierdie gewilde bron van inligting oor dieregesondheid is sedert sy ontstaan al 10 miljoen keer besoek.

’n Uitgebreide lys vrae en antwoorde oor siektes, soos slenkdalkoors, Afrika-varkgriep, voëlgriep en brucellose, is daar beskikbaar, asook raad oor hoe om parasiete veilig en doeltreffend te bekamp.

FOTO: LIZA BOHLMANN Vleisbeeste se waarde lê in hul groeivermoë en gesondheid. Hou die kondisie van jou beeste dop. Om te meet, is om te weet. Weeg daarom diere gereeld en teken dit aan om vas te stel watter diere nie genoeg gewig aansit nie. Daardie diere het dalk nie ’n goeie natuurlike weerstand teen parasiete nie en het waarskynlik behandeling nodig. Vra jou veearts om vas te stel of parasiete, soos lewerslak, die oorsaak is dat diere nie gewig aansit nie.

FOTO: VERSKAF Veeboere wat diere op veilings of by telers in streke ver van hulle plase af koop, moet ag slaan op die nuwe diere se natuurlike weerstand teen siektes. Dit is ook ’n goeie beleid om enige nuut ingekoopte diere in kwarantyn te hou voordat hulle by die kudde ingelyf word. Dring aan op gesondheidsertifikate wanneer diere ingekoop word. “Dit maak sin om bulle te koop wat in jou omgewing geteel en aangepas is om die streek se natuurlike weiding en veld goed te benut. ’n Plaaslik aangepaste bul het ook beter natuurlike weerstand teen die omgewing se bosluise as ’n bul wat van ver af kom,” sê mnr. John Boulle, rasdirekteur vir die SA Angus-beestelersgenootskap. “As jy ’n bul oor groot afstande of van een provinsie na ’n ander verskuif, moet jy seker maak dat jy hom onder noukeurige toesig hou om te vermy dat hy iets oorkom in sy nuwe omgewing.”