TREKKERVERKOPE WYS MARK BLY OPTIMISTIES

Hoewel trekkerverkope van 501 eenhede in Mei net vier eenhede meer is as die 497 eenhede wat verlede Mei verkoop is, lyk verkope vir die eerste vyf maande beter as in die ooreenstemmende tydperk verlede jaar. Daar is 11% meer trekkers tot Mei vanjaar verkoop.

Die volgehoue hoë vlak van trekkerverkope dui daarop dat die mark optimisties bly, sê mnr. Lucas Groenewald, voorsitter van die Suid-Afrikaanse Landboumasjinerie-assosiasie (Salma).

Hy wys ook daarop dat pryse vir toerusting redelik stabiel gebly het oor die afgelope paar maande ten spyte van die wisselvallige waarde van die rand. “Dié faktore dra by tot ‘n volgehoue kopersmark,” sê Groenewald in sy maandelikse verslag oor werktuigverkope.

Hy sê hoewel die mielie-oes teen Mei volstoom begin het, is die seisoen effens later as gewoonlik. Met die hoër vlakke van trekkerverkope oor die afgelope maande is ramings in die bedryf dat verkope vir die jaar tussen 6 500 en 6 750 eenhede sal wees, marginaal meer as verkope verlede jaar.

Met stroperverkope het dit Mei nie so goed gegaan nie en net 16 eenhede is verkoop. Dit is agt eenhede minder as die 24 eenhede wat verlede Mei verkoop is. Vir die eerste vyf maande van die jaar is stroperverkope ongeveer 11% laer as verkope vir die vorige ooreenstemmende tydperk.