Dié week in die landbou
OPERASIE BOORGAT
Die eerste boorgat in ’n projek van die liefdadigheidsorganisasie Gift of the Givers is Maandag 11 Junie op Sutherland geboor om nagenoeg 200 boorgate wat weens die knellende droogte opgedroog het, dieper te maak of te vervang. Sowat 40 000 liter brandstof, wat gebruik gaan word vir die boorwerk, is deur mnre. Herman en Marius Brelage van Volksrust teen kosprys aan Gift of the Givers verskaf. Die projek sal Gift of the Givers sowat R15 miljoen kos. Dr. Gideon Groenewald, ’n hidroloog met 35 jaar se ervaring, en mnr. Martyn Landman, ’n boorkontrakteur, behartig die boorproses. Lees meer by bit.ly/2JCADnJ ,enopbl.17.
SLAGTING
Suid-Afrika se eierbedryf het verlede jaar 4,69 miljoen lêhenne weens die uitbreking van voëlgriep verloor. Volgens mnr. Willie Bosoga, herkose voorsitter van die SA Pluimveevereniging se eierorganisasie, het 70% van lêhenne in die Wes-Kaap, wat die swaarste getref is, gevrek of is dit van kant gemaak. Hy sê eiers is ondanks die styging in eierpryse steeds die goedkoopste bron van proteïen per kilogram. Die situasie het gelei tot ’n styging van 124% in invoer en die bedryf het na raming sowat 500 (6,3%) werkgeleenthede verloor. Die lêhentrop van Suid-Afrika sal in die eerste vier maande van die jaar na verwagting op ’n jaargrondslag 8,3% kleiner wees en eierproduksie 8,1% laer.
SLENKDAL-GEVAAR
Verskeie sprekers op die Nasionale Wolkwekersvereniging se kongres verlede week in Port Elizabeth het boere gemaan om vroegtydig tydens die rustende wintermaande hul bestellings vir slenkdalkoors-entstof te plaas om Onderstepoort Biologiese Produkte genoeg kans en aanmoediging te gee om tydig die stowwe te vervaardig. Te midde van die huidige kudde-opboufase kan ’n uitbreking van dié siekte ’n dubbele slag wees vir boere wat nog herstel van die droogte. Dr. George de Kock, voorsitter van Cape Wools, waarsku die kans vir ’n uitbreking is vyf keer groter in ’n gebied indien die siekte al ’n vorige keer daar voorgekom het. ’n Geïsoleerde geval is onlangs naby Jacobsdal aangeteken.
HOËR HEFFING?
Wintergraanboere kan tot 29 Junie kommentaar lewer op’ n tegnologie heffing wat daarop gemik i som saadmaatskappye te vergoed vir hoër opbrengste. Alle partye gaan glo daarby baat vind. Die heffing, wat ’n jaar lank gegeld het, verval op 30 September. Die Nasionale Landbou bemarkingsraad( NL B R) moet ’n aanbeveling oor die voortsetting daarvan doen. Die heffing per ton koring, hawer of gars was R25/ton en die aanbeveling is dat dit in die nuwe seisoen R30/ton moet wees. Die insameling word deur die SA kultivar-en-tegnologie-agentskap gedoen. Volgens die sakeplan sal R57,5 miljoen ingesamel word, waarvan R43 miljoen aan saadmaatskappye sal gaan en R11 miljoen vir transformasie.
BEROERD
Die lae suikerprys en die droogte in die Wes-Kaap was ’n dubbele slag vir die genoteerde boerdery maatskappy Crookes Brothers. Die omset van sy boerderybedrywighede in die jaart ot Maart was 8% laer op R608 miljoen en sy bedryfswins het van R125 miljoen in 2017 tot R3 miljoen gedaal. Van 2017 se wesensverdienste van 424,1 sent per aandeel het die aandeelprys gedaal tot ’n wesensverlies van 50,6 sent per aandeel.
VASBERADE
Openbare verhore oor die gewysig- de wetsontwerp op die herstel van grondregte – wat ’n tweede ronde grondeise vir vyf jaar tot 30 Junie 2021 oopstel – begin vandeesweek. Dit is ondanks ’n aanbeveling van die onafhanklike hoëvlakpaneel onder oudpres. Kgalema Motlanthe dat ’n alternatief vir dié private ledevoorstel deur mnr. Justice Mnguni, ANC-LP, so gou moontlik geformuleer word. Die sittings oorvleuel ook met dié van die Parlement se grondwetlike hersiening s komitee wat ondersoek of dit nodig is om die Grondwet te wysig om onteiening sonder vergoeding moontlik te maak. Die program vir die openbare verhore is by tinyurl.com/ydhboy2f.
VRA VIR FAFFA EN WEN!
Dr. Faffa Malan en sy span kundiges antwoord al jare lank lesers se vrae op Landbou.com se kenner-afdeling, wat binnekort ’n splinternuwe baadjie aantrek ná ’n herontwerp en die oordra van rondom 4 500 vrae. Daarmee saam word ’n gratis maandelikse nuusbrief beoog met ’n keur van die nuutste inligting wat Malan en sy span beskikbaar stel. Teken in op dié nuusbrief en jy het ’n kans om Malan se nuutste boek, Vra die Veearts: Wat beesboere moet weet (2), te wen. Stuur ’n epos met die woord “Kundiges” in die onderwerplyn na webred@landbou.com.