Alle oë op polisie ná Grondwethof se skokuitspraak
BLY kalm en wag vir uitsluitsel van die polisie.
Dít was die reaksie van die Suid-Afrikaanse Vuurwapeneienaarsvereniging (Saga) op die Grondwethof se eenparige beslissing op 7 Junie dat die sowat 300 000 Suid-Afrikaners wat nie hul vuurwapenlisensies betyds hernu het nie, tegnies onwettig in besit van hul vuurwapens is.
In die uitspraak deur regter Johan Froneman is bevind artikel 24 en artikel 28 van die Wet op die Beheer van Vuurwapens (Wet 60 van 2000) is nie ongrondwetlik nie. Die Noord-Gautengse Hooggeregshof het die SA Jagters- en Wildbewaringsvereniging (SA Jagters) verlede jaar gelyk gegee dat dié artikels irrasioneel en vaag is, en dit ongrondwetlik verklaar.
Die Grondwethof het dié beslissing van die Hooggeregshof ter syde gestel.
Volgens die betrokke artikels moet vuurwapeneienaars wie se lisensies verval het, dit by die naaste polisiekantoor inhandig vir vernietiging. Hulle mag aansoek doen om vergoeding. Die bestaande wetgewing maak glad nie voorsiening vir die indien van laat aansoeke nie.
WAG EN KYK
Adv. John Welsh, regskenner van Saga, sê in ’n verklaring die organisasie verwag dat die Minister van Polisie of die nasionale polisiekommissaris eersdaags ’n aankondiging sal maak oor vuurwapenlisensies wat verval het.
Mnr. Fred Camphor, uitvoerende hoof van SA Jagters, sê sy organisasie probeer om dringend met die minister oor die saak te vergader. Talle lede van SA Jagters wat probeer het om vuurwapens by polisiekantore regoor die land in te handig, is glo huis toe gestuur met hul “onwettige” wapens.
“Mense sê vir my die polisie weier om die vuurwapens te aanvaar en sê die eienaars moet wag om te hoor wat die polisie gaan doen.”
Saga en SA Jagters hoop dat ’n beoogde amnestietydperk ingestel sal word. Volgens Saga geld die staande opdrag aan polisielede om nie mense wie se lisensies verval het, te vervolg nie totdat daar ’n nuwe opdrag gegee word.
“Ons meen dus daar sal binnekort ’n verdere opdrag gegee word,” sê Welsh.
Hy beveel aan dat eienaars hul wapens hou en wag vir die amnestie. Eienaars wat nie kans sien om te wag nie, kan die vuurwapens by die polisie inhandig vir vernietiging. Omdat die wapens nou onwettig is, mag dit nie verkoop word nie en ook nie deur ’n wapensmid onbruikbaar gemaak word nie.
OU LISENSIES
Vuurwapens van mense wat nie ingevolge Wet 60 van 2000 om lisensies aansoek gedoen het nie, maar nog in besit van die groen lisensiekaartjies ingevolge die vorige wetgewing is, word nie deur die Grondwethof se uitspraak geraak nie.
Sommige regskenners meen glo mense wie se “nuwe” lisensies verval het, kan hulle op die ou lisensies beroep as hulle dit nog het. Camphor en Welsh meen egter dat dit nie deur ’n hof aanvaar sal word nie.
Camphor sê vuurwapeneienaars wat om die sogenoemde wit lisensiekaartjies aansoek gedoen het, het hulself tot die nuwe wetgewing verbind.
Brig. Vish Naidoo van die polisie het teen druktyd nie op Landbouweekblad se versoeke om kommentaar gereageer nie.