Winterpoeding uit ouma se kombuis
Fluweelpoeding
Hierdie heerlikheid het my ouma Minnie baie Sondagmiddae in die winter vir ons gemaak. My pa, oom en tannies het daarmee grootgeword en hulle het dit “beeskwaspoeding” genoem. Waar die snaakse naam vir fluweelpoeding (in Engels Queen of puddings) vandaan kom, kan hulle nie onthou nie, net dat Ouma soms “padda-ogies” in die melkpap gegooi het.
125 ml suiker
■ 3 ml sout
■ 180 ml koekmeelblom
■ 1 liter melk
■ 4 ekstragroot eiers, geskei
■ 60 ml botter
■ 5 ml vanieljegeursel
■ 100 ml appelkooskonfyt
■ 100 ml strooisuiker
■
Voorverhit die oond tot 160 °C. Meng die suiker, sout en meel saam. Voeg die helfte van die melk by die droë mengsel en roer tot ’n gladde pasta. Verhit die res van die melk tot kookpunt. Voeg by die pasta en meng goed. Gooi alles terug in die kastrol en verhit tot kookpunt. Prut liggies oor lae hitte tot verdik en gaar. Verwyder van die hitte en klits die eiergele, botter en vanieljegeursel by. Skep die pap in ’n gesmeerde oondbak en bak vir ongeveer 35 minute. Haal uit die oond en laat effens afkoel. Smeer die appelkooskonfyt versigtig oor. Klits die eierwitte tot stywe punte vorm en voeg die strooisuiker lepel vir lepel by. Hou aan klits tot dik en blink. Skep die meringue bo-op die appelkooskonfyt en smeer tot teen die kante. Sit terug in die oond en bak tot die meringue goudbruin is. Sit warm voor. Lewer 6 porsies.