Veilingsverslae

Die Dexter lok al hoe meer belangstelling van kommersiële telers wat dié ras in groter getalle koop. Dit is in teenstelling met die neiging van kleinboere wat beperkte getalle in klein kampies om dorpe aanhou.

Mnr. Ockie Barnard, voormalige voorsitter van die Dexter-beestelersgenootskap van Suid-Afrika, sê dit is veral die vraag uit die kommersiële bedryf wat die prys van Dexters in ’n beperkte aanbod laat styg.

Die genootskap ondervind dieselfde neiging as ander grootveerasse dat die vraag na vroulike diere die aanbod oorskry.

Op die afgelope Overvaalklubveiling by die Willem Pretorius-museum het vroulike diere meer as R30 000 stuk behaal. Die prys van bulle beloop van R30 000 tot R40 000 stuk.

Volgens Barnard is die ras se rekordprys vir ’n bul R100 000, wat in September 2016 op die produksieveiling van mnr. Hendrik Strydom van Petrusburg behaal is toe Amadeus Fred aan dr. Jak Strydom van Aliwal-Noord verkoop is.

Goeie pryse is ook verlede jaar vir ander stoetdiere betaal, soos ’n bul wat teen R38 000 by die Willem Pretorius-museum verhandel is.

Die Dexters het weer vanjaar aan die Royal-skou by Pietermaritzburg deelgeneem. Volgens Barnard is die ras se huidige groeipunte steeds in dié provinsie en in Limpopo.

Navrae oor dié ras kan aan lede van die genootskap op die webwef www.dextersa.co.za gerig word.