DIEANDERSÊ

DIE Gautengse provinsiale regering gaan nie wag totdat die Parlement se grondwetlike hersieningskomitee klaar is met sy ondersoek na ’n moontlike wysiging van artikel 25 van die Grondwet voordat hy begin om grondbesitpatrone in die provinsie aan te pak nie, het mnr. Jacob Mamabolo, Gautengse LUR vir infrastruktuurontwikkeling, verlede week in die provinsiale wetgewer gesê.

Hy sê die provinsie sal grond in privaat- en staatsbesit oorweeg vir onteiening sonder vergoeding as deel van grondhervorming in die openbare belang.

Mamabolo het aan Business Day gesê die Gautengse regering sal grond in private besit onteien om in die openbare vraag te voorsien. Dit sluit in eiendom, grond en geboue. Openbare belang kan byvoorbeeld wees vir infrastruktuurontwikkeling.

Mamabolo is ’n lid van die taakspan wat mnr. David Makhura, Gautengse premier, in Mei aangestel het om ’n plan te ontwikkel vir die spoedige beskikbaarstelling van grond in die provinsie. Dit sluit in om stukke grond te identifiseer wat deur plaaslike en provinsiale owerhede, asook die nasionale Regering besit word en wat toegewys kan word aan mense wat daarvoor in aanmerking kom.

Daar was die afgelope tyd verskeie onwettige grondbesettings en betogings oor behuisingstekorte in die provinsie.

Mnr. Makashule Gana, DA-lid van die wetgewer, het veranderinge aan die Grondwet verwerp en gesê onteiening sonder vergoeding is niks meer nie as “’n manier vir Suid-Afrikaners om permanente huurders op hul geboortegrond te wees terwyl die grond aan die staat behoort”.