WATERBRONNE, VOERBANK ONDERSOEK
Twee sake van nasionale belang — die nasionalisering van waterbronne en die daarstelling van ’n voerbank vir veeboere — is onlangs op twee afsonderlike boerebyeenkomste bespreek.
Op die 16de jaarlikse kongres van die Suidwestelike Distrikte se landbou-unie op Riversdal het mnr. W.G. Schaap in sy voorsittersrede gesê voorsiening sal gemaak moet word vir waterbewaring. Dit is van die grootste belang vir die uitbreiding van die landbou en nywerhede.
Die kongres het besluit dat hy “die departement van besproeiing ondersteun in enige skema wat sal sorg dat elke druppel water aangewend sal word tot nut van die land” en hy vra die departement “om in sy streekbeplanning ten eerste te sorg vir genoeg watervoorrade vir die reeds gevestigde gebiede”.
Op die sitting van die voerbankkomitee in Bloemfontein is aangekondig dat ’n finale plan vir ’n voerbank vir die land voor die einde van die jaar opgestel en aan die landbou-unies en die Nasionale Wolkwekersvereniging voorgelê sal word.
Mnr. S.J. de Swardt, hoof van die departement van landbou se afdeling ekonomie en markte en voorsitter van die komitee, het gesê die voerbank sal van so ’n aard wees dat dit in die verskillende behoeftes van veeboere sal voorsien. (LBW ,9en30 Junie 1948)