SAKESEKTOR, NIE VAKBONDE, SAL SA RED
VASTE kapitaalbeleggings pleks van ’n geflikflooi met vakbonde is wat die ekonomie nodig het om weer behoorlik aan die gang te kom, sê me. Nicky Weimar, senior ekonoom van Nedbank.
Sy het op Mpumalanga Landbou se kongres op Witrivier gesê as besighede nie bereid is om die risiko te loop om in Suid-Afrika te belê nie, sal daar nie werkskepping wees nie en dan sal die ekonomie nie sy groeipotensiaal verwesenlik nie.
“Die Regering moet ophou om met vakbonde te praat oor werkskepping. Vakbonde belê nie geld in Suid-Afrika nie, hulle loop nie risiko’s nie. Om groei te bewerkstellig moet jy met besighede praat.”
Sy sê die politieke beleidsomgewing in Suid-Afrika skrik beleggers af. Onbetroubare infrastruktuur, hoë arbeidskoste en lae produktiwiteitsvlakke maak dat beleggers eerder in ander ontluikende ekonomieë belê.
Sy verwys spesifiek na die onsekerheid oor eiendomsreg en sê dit is een van die belangrikste oorsake van swak beleggersvertroue in Suid-Afrika. “Ek twyfel of ons pres. Cyril Ramaphosa se $100 miljard-beleggingsteiken sal behaal.”
MAAK DUIDELIK
Volgens Weimar moet die staat se rol in die ekonomie eers deeglik gedefinieer word en dan moet die Regering hom binne daardie grense hou. Die onsekerheid oor eiendomsreg en die kwessie van waarde-vir-geld-arbeid moet getakel word, dan sal meer beleggers hul kapitaal in Suid-Afrika kom bestee.
Ten spyte van hierdie kwessies, sê Weimar Suid-Afrikaners kan vir die res van vanjaar asem skep voordat hulle volgende jaar weer die gordel stywer sal moet trek.
Die verwagting is dat die ekonomie tot aan die einde van die jaar sal groei, maar dat die impak van ’n mielie-oes wat 20% kleiner is en hoër ruoliepryse volgende jaar tot hoër inflasie gaan bydra.
Sy verwag dat die rand volgende jaar saam met ander ontluikende markte se geldeenhede sal verswak teenoor die dollar en dat Suid-Afrikaners hulle kan regmaak vir ’n rentekoersverhoging in die tweede helfte van volgende jaar. “Ons verwag dat daar dalk twee verhogings van 25 basispunte elk kan wees. Dit is dus net ’n verhoging van ’n halwe persentasiepunt en nie die einde van die wêreld nie.”
STABIEL
Sy sê die ekonomiese vooruitsigte vir Suid-Afrika is stabieler as die afgelope paar jaar en dat die wêreldekonomie na verwagting oor die volgende twee tot drie jaar gaan groei. Dit sal ’n verhoging in die vraag na kommoditeite meebring. Dit is goeie nuus vir Suid-Afrika, aangesien kommoditeite 60% van die land se uitvoer verteenwoordig.
Vakbonde belê nie geld in Suid-Afrika nie, hulle loop nie risiko’s nie.