ONTEIENING | Dié grond moet kosproduksie en -sekerheid bevorder

Die Regering is vasbelote om die onteiening van grond sonder vergoeding op só ’n wyse toe te pas dat dit voedselproduksie en -sekerheid sal bevorder en nie benadeel nie, het mnr. Sfiso Buthelezi, Adjunkminster van Landbou, Bosbou en Visserye, op ’n konferensie van die Rooivleis-abattoirvereniging (RVAV) op die Spier-landgoed buite Stellenbosch gesê.

Hoewel dit ’n hoogs emosionele kwessie is, moet dit voortgaan, en daar kan nie foute gemaak word nie. Die ongelykheid van die apartheidsverlede moet ongedaan gemaak word. Ongelykheid, en die groeiende aard daarvan, is ook deur die graderingsorganisasies aangedui as ’n probleem wat in Suid-Afrika voortbestaan.

Hy sê dit is belangrik om kennis te neem dat die RVAV nou saamwerk met die Departement van Landbou, Bosbou en Visserye op verskeie gebiede, waaronder die nasionale dieregesondheidsforum, die onafhanklike raadgewende forum vir vleisinspeksie, die koördineringskomitee vir die sorg van lewende hawe en die bedryfsforum vir lewende hawe en dierevoeding.

Die departement is tans besig om wildsvleisregulasies te finaliseer in ooreenstemming met rooivleisregulasies, het hy gesê. Om ’n vleisuitvoermark te open en te onderhou, moet die staat en die bedryf nou saamwerk in die nakoming van die maatreëls en die vereistes waarop ooreengekom is.

“Ongerymdhede kan lei tot die sluiting van so ’n mark, en ondervinding het geleer dat dit nie maklik is om dit te heropen nie,” het hy gesê.