KAAPSE BOERE MOET ÓÓK WAAK TEEN KOMMANDOWURM
MOTTE van die skadelike herfskommandowurm is in Mei in lokvalle in die Overberg gekry.
“Die motte wat ons in die lokvalle gekry het, is vir ons ’n vroeë waarskuwing dat hulle die WesKaap bereik het. Tot voor Mei was daar niks nie,” sê mnr. Jan Hendrik Venter, bestuurder van vroeë waarskuwingstelsels vir plantgesondheid by die Departement van Landbou, Bosbou en Visserye.
“Volgende jaar gaan deurslaggewend wees, daarom moet ons die situasie dophou.”
Die motte is in lokvalle naby lusernlande by Riviersonderend en in koringlande op twee plase by Swellendam gekry.
Al sal die wurms vermoedelik nie die koue Kaapse winter oorleef nie, moet boere gereeld deur hul lande stap en dadelik die Departement van Landbou, Bosbou en Visserye in kennis stel as hulle larwes kry wat hulle nie ken nie.
Die larwes is van 1 mm tot 40 mm of 50 mm lank, maar omdat dit nogal kundigheid verg om te bevestig dat dit ’n herfskommandowurmlarwe is, moet boere enige verdagte larwes aanmeld.
Venter sê die herfskommandowurm is ’n migrerende plaag en die motte kan ver vlieg. Daarom gaan monitering en opnames voort, sê Venter. Die departement gaan lokvalle in meer dele van die kleingraandistrikte uitsit om te bepaal hoe ver die mot deur die provinsie versprei het.
“As die mot ’n geskikte gasheer kry, kan dit eiers lê, maar dis nou koud, en die motte hou nie van temperature van laer as 10 °C nie. Ons vermoed dit is die laaste motte wat gevlieg het, maar ons kan dit nie met sekerheid sê nie.”
Volgens ’n persverklaring van die departement is herfskommandowurms ook in Mei naby George opgespoor. Die Departement van Landbou, Bosbou en Visserye se feitegids oor die herfskommandowurm kan hier afgelaai word: https://bit.ly/ 2K51FUh
Kontakmnr. JanHendrikVenterby 012 319 6384 of JanHendrikV@ daff.gov.za, of die plaaslike kantoor van die Wes-Kaapse departement van landbou met navrae of aanmeldings.