GOEIE REËN KON DIE DROOGTE NOG NIE BREEK
“DIE droogte in die Wes-Kaap is nog glad nie gebreek nie,” sê mnr. Johan van den Berg, klimatoloog van Santam Landbou.
Hoewel die watersituasie in die provinsie begin verbeter, is nog baie reën nodig om die droogte te breek, luidens sy jongste weerverslag.
Die reën wat in Mei en Junie vanjaar in die Wes-Kaap geval het, was net betyds vir wintergraanboere om binne die optimale planttyd te plant. Damvlakke het ook verbeter, maar die situasie bly steeds kritiek.
Voorlopige reënvalvoorspellings lyk belowend in die res van Junie en in Julie, veral in die weste en suidweste van die provinsie.
“Dit lyk of die Suid-Kaap dalk minder reën kan kry in die res van Junie en in Julie,” sê hy.
“Daar is ’n groot mate van onsekerheid oor verwagte reënvaltoestande in Augustus en September,
deurslaggewende maande vir wintergraanproduksie.”
MOONTLIKE EL NIÑO
Volgens Van den Berg sal die somer van 2018-’19 op ’n baie beter noot begin as die meeste van die afgelope paar jaar in die somerreëngebied. Goeie reën in die laatsomer en herfs sal beter grondwatervlakke tot gevolg hê.
See-oppervlaktemperature het wegbeweeg van La Niña-toestande en is tans neutraal, maar die moontlikheid bestaan dat El Niño-toestande in die lente kan ontwikkel. Van den Berg sê dit is tans te vroeg om waarde te heg aan dié voorspellings. Daar sal eers teen Augustus of September meer duidelikheid daaroor wees.
“As die El Niño-ontwikkeling versterk, kan dit die kans op lentereën verhoog, maar die midsomerreëntoestande verswak,” sê Van den Berg.
“Die grondwatertoestande vir hierdie tyd van die jaar is baie beter as in die afgelope paar jaar. Dit kan die uitwerking van ’n El Niño versag as dit wel ontwikkel.”
Die moontlike El Niño-verskynsel sal die kans op reën in Namibië in die mid- tot laatsomer van 2018-’19 laat verswak, sê hy.
–