SUID-AFRIKA SE EIE KULTIVAR BULT SY SPIERE
NAVORSING, bemarking en kennisoordrag het gehelp om Pinotage die afgelope dekade een van die gewildste rooiwyn-kultivars in Suid-Afrika te maak.
Pinotage is die enigste rooiwynkultivar waarvan die aanplantings die afgelope dekade toegeneem het. Dit staan nou op 6 979 ha. Die verkoopsyfers is selfs indrukwekkender, want sedert die eeuwisseling het plaaslike verkoopsyfers van 3 miljoen liter per jaar gestyg tot meer as 5 miljoen liter per jaar. Uitvoer het sedert 2001 van net meer as 8 miljoen liter gegroei tot bykans 19 miljoen liter. Dit het verlede jaar bykans R500 miljoen tot die plaaslike ekonomie bygedra.
“Die Pinotage-mark ontplof. Teen sowat 24 miljoen liter per jaar is dit een van die Suid-Afrikaanse wynbedryf se sprokiesverhale, en dit lyk nie of die goeie tye enigsins binnekort tot ’n einde gaan kom nie,” lui ’n verklaring van die Pinotage-assosiasie.
“Die verbeterde gehalte en aanloklikheid van die kultivar was veral in die afgelope dekade opvallend.”
WYNMAKERS WOEKER
Mnr. Beyers Truter, voorsitter van die Pinotage-assosiasie, sê die sukses kan veral aan kundige wynmakers en goeie bemarking toegeskryf word.
“Veral die jonger wynmakers is meer berese en kry met meer wynstyle te doen. As ek ’n Engelse uitdrukking kan gebruik, hulle is meer in sync met hul terroir en maak wyne wat pas by hul gebied se grond en klimaat. Dit het enorme verbetering in die gehalte gebring.”
Die Pinotage-assosiasie, ondersteun deur geldelike bydraes van Absa, het ook hard gewerk om Pinotage aan verbruikers in Suid-Afrika en in die buiteland te bemark.
“Dit help nie jy maak hierdie wonderlike wyne, maar niemand weet daarvan nie. In die algemeen bemark ons lede nie net hul eie handelsmerke nie, maar hulle besef ook hoe belangrik dit is om die kultivar generies te bevorder.”
GROEI, ORAL
Pinotage-verkope in Suid-Afrika se grootste uitvoermarkte, Brittanje en Duitsland, het tot onderskeidelik 5 miljoen liter en 5,4 miljoen liter gegroei. In 2001 was dié syfers onderskeidelik 3,5 miljoen liter en 0,8 miljoen liter. Nuwe markte wat potensiaal toon, is China en Rusland, waar daar tans onderskeidelik 2,6 miljoen liter en 1,5 miljoen liter Pinotage verkoop word.
Truter sê die prys wat wynmakers vir Pinotage-druiwe betaal, het ook tred gehou met die vooruitgang.
“Ons wil steeds na maniere kyk om die totale Pinotage-omset te verdubbel. Dis ons mikpunt dat die primêre produsent meer verdien vir sy produk sodat dit kan deursypel na die werker toe.”
Hy sonder Stellenbosch steeds uit as die bakermat van goeie Pinotage, maar sê daar is ook ’n besliste verskuiwing na ander gebiede, soos dele van die Paarl en Wellington.
“Dit maak my baie bly dat (Pinotage van) ander gebiede, met hul unieke style en smake, ook presteer in die Absa Pinotage Top-10-wynkompetisie.”